Türk dunyasi iptar programmisida “Uyghurlar we ürümchi kéchisi” pa'aliyiti ötküzüldi

Türkiyining eskisheher wilayiti 2013 yili türk dunyasi medeniyet paytexti bolup élan qilin'ghandin kéyin her küni dégudek türk dunyasigha alaqidar medeniyet pa'aliyetliri dawam qiliwatidu. Bu munasiwet bilen 25 - iyul peyshenbe küni “Uyghurlar we ürümchi kéchisi” dégen namda eskisheherning jumhuriyet we tunali mehelliside iptar programmisi uyushturuldi.

Bu pa'aliyetke eskisheher waliyisi gön'gür azim tuna qatarliq 2500 din artuq kishi qatnashti. Türk sen'etchi exmet yéngilmesning riyasetchilikide ötküzülgen köngüldiki sözler dégen programmigha enqere uniwéristétining oqutquchisi doktur erkin emet qatnashti we Uyghurlarning hazirqi weziyiti toghrisida muhim söz qildi.

Kéyin exmet yéngilmes söz qilip, osman baturning ölümi aldidiki weqelerni we osman baturning sözlirini anglitip yighin ehlini hayajan'gha saldi. Sen'etchi exmet yéngilmes Uyghurlar üstidin yürgüzülüwatqan zulum toghrisida sözlewitip köz yashlirini tutalmay qaldi.

Pa'aliyette yene, eskisheher waliyisi gön'gür azim tuna ependi söz qilip, türk dunyasida insaniyetning éhtiyaji bolghan her nersining barliqini bildürdi.

Waliy azim tuna ependi yéqindin buyan dunyada yüz bériwatqan qayghuluq weqelerni tilgha élip mundaq dédi: yunus hemraning insanlargha méhri - shepqet körsetkinige oxshash bir dunyaning bolushini arzu qilimen. Bügünki kündiki dunya méhri - shepqettin uzaq zalim bir dunyadur. Rehimsiz bir dunyada qan tökülüwatidu, yash éqiwatidu. Emma dunya mewjut bolghandin bashlap yaxshiliq bilen yamanliq otturisida küresh bolup keldi. Bügün biz türk dunyasining medeniyet paytexti eskisheherde turuwatimiz. Bu kéche munasiwiti bilen sherqiy türkistandiki qérindashlirimizgha bu yerdin salam bérimiz. Aliy éhtiram bildürimiz we chongqur méhri - shepqet yollaymiz.

Eskisheherning 2013 - yili türk dunyasi medeniyet paytexti bolup belgilen'genliki munasiwiti bilen köp xil pa'aliyetlerni élip baridighanliqini bildürgen waliy azim tuna ependi, türk dunyasining kelgüsi iz basarliri bolghan perzentlirimizge kelgüsimizge, bizni biz qilghan qimmetlik medeniyetlirimizni choqum bir usulda ögitishimiz kérek, dédi.

Pa'aliyet jeryanida yene Uyghur perzenti mujahid qeshqerli, mehmet akif ersoyning “Ketme ey musapir” dégen shé'irini jarangliq déklamatisiye qilip yighin ehlini qizghin hayajan'gha saldi, bezi kishiler shé'irni anglap köz yashlirini tutalmidi.

Pa'aliyette yene sha'ire nur'ela köktürk xanim Uyghurlarning leghmen tamiqini qandaq teyyarlaydighanliqini emeliy misal arqiliq körsetti.

Iptar waqti kélishi bilen yighin ehli birdek qol kötürüp Uyghurlar üchün du'a qildi. Yighin meydanining etrapida ay yultuzluq kök bayraqlar lepildi.

Biz bu yighin toghrisida téximu köp melumatqa érishish üchün, pa'aliyetke qatnashqan Uyghur ziyaliy azadjan bughra we hamut köktürk ependiler bilen söhbet élip barduq. Azadjan bughra ependi bu yighinning Uyghurlar üchün ehmiyetlik bir yighin bolghanliqini bildürdi.