Shiwétsiyede ötküzülgen “Uyghur medeniyet kéchiliki” alqishqa érishti

Ixtiyariy muxbirimiz ekrem
2017.10.14
shiwetsiye-uyghur-medeniyet-kechiligi-2017-1.JPEG Shiwétsiyede ötküzülgen “Uyghur medeniyet kéchiliki” din bir körünüsh. 2017-Yili 13-öktebir, sitokholm, shiwétsiye.
RFA/Ekrem

13-Öktebir shiwétsiyening sitokholm shehiride ötküzülgen Uyghur yashlirini démokratiye, kishilik hoquq, qanuniy bilimler bilen terbiyilesh kursining bir künlük programmisi axirlashqandin kéyin, kech sa'et 18:00 din bashlap bu kursqa qatnashqan 60 tin artuq wekil bilen shiwétsiyede yashawatqan Uyghur jama'iti bir yerge jem bolup “Uyghur medeniyet kéchiliki” pa'aliyiti ötküzdi.

Tolimu qizghin keypiyatta ötküzülgen bu pa'aliyette her türlük Uyghur ta'amliri medeniyiti hemde güzel Uyghur sen'iti namayan qilindi. Pa'aliyetke d u q rehberliridin rabiye xanim, ömer qanat, dolqun eysa, nuri türkel, dilshat rishit, gheyur qurban ependiler hemde u n p o wekilliri, shiwétsiye ma'arip uyushmisi bilen shiwétsiye Uyghur jem'iyitining rehberliri hem ezaliri, shundaqla paytext sitokholm we etraptiki sheherlerde yashaydighan köpligen Uyghurlar qatnashti. 

“Uyghur medeniyet kéchiliki” pa'aliyitining échilish nutqini shiwétsiyediki Uyghur mötiwerliridin faruq sadiqof ependi sözlidi. Faruq ependining nutqidin kéyin, naxsha-sadaliri ichide sherqiy türkistanning ay-yultuzluq chong bayraqi sehnige élip chiqilip qadaldi. Kishiler hayajan ichide güldüras alqishlar yaghdurushti.

D u q re'isi rabiye xanim pa'aliyet muqeddimiside söz élip, shiwétsiyediki Uyghur jama'itige bolghan rehmitini bildürüsh bilen birge, xitayning Uyghur diyarida élip bériwatqan her türlük zulumliri heqqide toxtilip, pütün shiwétsiyediki Uyghurlarni Uyghur milliy dewasini yéqindin qollashqa chaqirdi.

Shiwétsiyede ötküzülgen bu “Uyghur medeniyet kéchiliki” pa'aliyiti d u q ning teshebbusi we yardimi bilen uyushturulghan bolup, pa'aliyet jeryanida Uyghurche usullar, naxshilar orunlinip kishilerni hayajan'gha saldi. 

Pa'aliyet jeryanida d u q bash katipi, wakaletsiz milletler teshkilatining mu'awin re'isi dolqun eysa ependimu sözge teklip qilindi. D u q bayanatchisi dilshat rishit ependimu söz élip, Uyghur jama'itini shiwétsiyede qanat yéyiwatqan pa'aliyetlerge pa'al qatnishishqa chaqirdi.

“Uyghur medeniyet kéchiliki” pa'aliyiti kech sa'et 18:00-22:00 giche dawam qildi. Uyghur jama'iti shox usullargha chüshüp, köngüllirini xush qilishti. Pa'aliyetke Uyghurlardin sirt, özbék, qazaq, tatar, türk qatarliq milletlerning wekillirimu qatnashqan bolup, ularmu nutuqlar sözlep xitay hakimiyitining basturush siyasetlirini eyiblidi we shé'irlar déklamatsiye qiliship, qérindashliq küylirini yangratti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.