Uyghur medeniyiti myunxén milletler medeniyet körgezmiside körek qilindi

Gérmaniyening myunxén shehiride 6 - dékabir küni ötküzülgen 9 - nöwetlik milletler medeniyiti körgezmisige qatnashturulghan Uyghur medeniyitige a'it buyumlar we Uyghur sen'iti yuqiri bahagha érishti.

9 - Nöwetlik milletler medeniyiti körgezmisi 6 - dékabir küni myunxén shehiridiki “Bir dunya öyi” namliq xelq'ara teshkilatlarning pa'aliyet merkizide ötküzülgen bolup, 50 din artuq millet özlirining milliy medeniyitige a'it buyumlarni bazargha salghan bu sorun'gha gérmaniye Uyghur ayallar komitétimu Uyghur ta'amliri, sen'et buyumliri we ishtin sirtqi sen'etkarlarni qatnashturup tamashibin hemde xéridarlarning yuqiri bahasigha érishti.

6 - Dékabir küni kech sa'et yette bilen bashlan'ghan bu pa'aliyetning échilish nutqini sheher bashliqi sözlidi. Sheher bashliqi myunxén shehiridiki her millet xelqining bir a'ile kishiliri ikenlikini, bu yerde irqiy, milliy ayrimichiliqning mewjut emeslikini mezmun qilghan nutqining axirida, ikki kün ilgiri qaza qilghan jenubiy amriqining milliy qehrimani nélson mandila heqqide toxtilip ötti we uning ölümige bolghan qayghusini ipadilidi. Sheher bashliqining nutqidin kéyinla sheherlik medeniyet idarisining mezkur pa'aliyetke mes'ul xadimi Uyghurlar heqqide qisqiche chüshenche bérip, bügünki sehnining Uyghurlargha mensupluqini, yash Uyghur sen'et heweskarlirining Uyghurche sen'et nomurliri bilen bu qétimqi medeniyet körgezmisige hayatiy küch béghishlaydighanliqini eskertti. Derweqe, 9 - nöwetlik milliy medeniyet körgezmiside kishilerning diqqitini bekrek chekkini Uyghur usulliri boldi.

Uyghur folklori tetqiqatchisi nurnisa xanim sehnige chiqip Uyghurlar heqqide pa'aliyet ishtirakchilirigha yene bir qétim chüshenche bérip ötkendin kéyin, Uyghur sen'iti sehnide jewlan qilishqa bashlidi. Mungluq Uyghurche naxsha bilen güzel Uyghur usulliri tamashibinlarning qizghin alqish sadaliri ichide uzun'ghiche dawam qildi. Bu qétim myunxén sheherlik medeniyet idarisi teripidin teshkilligen 9 - nöwetlik milliy medeniyet körgezmisining sehnisi peqetla Uyghurlargha bérilgen bolup, her millet tamashibinlardin sirt, sheher bashliqi yétekchilikidiki hökümet xadimliri we bu pa'aliyetke qatnashqan her millet kishiliri arqa - arqidin orunlan'ghan Uyghurche usullarni körüp qizghin alqishlar yaghdurdi we Uyghur sen'itige yuqiri bahalar bérishti.

Gérmaniye Uyghur ayallar komitéti 9 - nöwetlik milliy medeniyet körgezmisige yene Uyghurche ta'amlar we sen'et buyumlirini qatnashturghan bolup, mezkur teshkilatning re'isi gülnar xanim ziyaritimizni qobul qilghanda, Uyghurche yémekliklerning kishilerning yaxshi bahasigha érishiwatqanliqini tilgha aldi. Bu pa'aliyetke ishtirak qilghan muxteber xanimmu kishilerning Uyghur medeniyitige bolghan yuqiri bahaliridin iptixar hés qiliwatqanliqini tekitlidi.

Pa'aliyetning aldi keynide kishiler yene sheher bashliqi bilen birge xatire süretlerge chüshüshti we öz'ara pikir almashturushti.