Bashqirtistanda ötküzülgen xelq'ara sen'et féstiwalida Uyghur naxshichi bash mukapatqa érishti

Ixtiyariy muxbirimiz oyghan
2018-06-19
Élxet
Pikir
Share
Print
Bashqirtistan paytexti ufa shehiride ötküzülgen "Ural mono-2018" xelq'ara sen'et féstiwalidin bir körünüsh. 2018-Yili 9-iyun. Ufa, bashqirtistan.
Bashqirtistan paytexti ufa shehiride ötküzülgen "Ural mono-2018" xelq'ara sen'et féstiwalidin bir körünüsh. 2018-Yili 9-iyun. Ufa, bashqirtistan.
RFA/Oyghan

7-We 9-iyun künliri bashqirtistan paytexti ufa shehiride türkiy xelqler yashlirining "Ural mono-2018" xelq'ara sen'et féstiwali bolup ötti. Uninggha türkiye, qirghizistan, özbékistan, qazaqistan hemde rusiye fédératsiyesining tataristan, towa, yaqutiye, daghistan, bashqirtistan, altay jumhuriyetliridin hemde moskwa shehiri we astraxan wilayitidin kelgen sen'etkarlar bolup, türkiy tilliq 10 millettin 30 wekil qatnashti. Melum bolushiche, mezkur féstiwalni bashqirtistanning jumhuriyetlik xelq ijadiyet merkizi, ufa sheherlik hökümet we ishimbay nahiyilik hökümet uyushturghan bolup, rusiyening medeniyet ministirliqi hemde polyonof namidiki rusiye dölet xelq ijadiyet öyining qollap-quwwetlishi bilen ötküzülgen. Féstiwalning échilish murasimigha bashqirtistanning medeniyet ministiri amine shafiqowa qatniship, nutuq sözligen.

Ufada bolup ötken féstiwalning netijiliri heqqide qazaqistanning her xil ammiwi axbarat wasitiliri xewer berdi. Shularning biri bolghan "Axbarat byurosi" agéntliqi bergen xewerde mundaq déyilgen: "Qazaqistanliq resul qurbanof ufada 'ural mono-2018' xelq'ara sen'et féstiwalining bash mukapitini qazandi. Uninggha 250 ming rubliliq (yeni texminen 1 milyon 330 ming tenggilik) guwahname tapshuruldi," déyilgen.

Almuta wilayiti talghir nahiyisining güldala yézisida yashawatqan resul qurbanofning éytishiche, bu musabiqige qazaqistandin kelgen yérdén jaqsibékof "Naxshichi hem ijrachi" derijisi boyiche, "Muragér" étno-folklor ansambili "Chalghu eswablar kolléktipi" derijisi boyiche ikkinchi derijilik orunlargha muyesser bolghan iken. Igilishimizche, musabiqining bashqimu qatnashquchiliri her xil mukapatlargha érishken. Féstiwalning bahalighuchilar komissiyisi terkibide qazaqistandin barghan "Turan dunyasi" jem'iyetlik fondining mudiri karlin mexpirofmu bar bolup, u fond namidin yaqutiye, altay we bashqirtistan jumhuriyetlirining qatnashquchilirigha pexriy yarliqlar tapshurghan. 
Resul qurbanof radiyomiz ziyaritini qobul qilip, mezkur musabiqige tonulghan sen'etkar, kompozitor polat hézimofning teklipi bilen qatnashqanliqini, shuning üchün uninggha alahide minnetdarliq bildüridighanliqini otturigha qoyup, mundaq dédi: "Eslide u yerge men polat aka bilen bérishim kérek idi. Men yéngi öylen'gen idim. Shuning üchün polat aka méni ayalim bilen birge ewetti. Musabiqe nahayiti yuqiri derijide ötti. Her millettin kelgen ijrachilarning teyyarliqlirini kördüm. Musabiqe ikki qisimdin ibaret boldi. Birinchiside men abdulla abduréhimning 'eslersenmu' dégen naxshisini éyttim. Ikkinchi qisimda Uyghur 'on ikki muqam' liri ichidiki 'chebiyat' muqamini éyttim. Rastini éytsam, men mundaq qararni kütmigen. Xushalliqimdin gepmu qilalmidim. Men u yerge barghanda mukapat élishni meqset qilmidim. Uyghurning kim ikenlikini tonumaydighan xelqlerge Uyghur medeniyitini, sen'itini körsitish üchün bardim. Men Uyghurlarni az bolsimu tonuttum dégen ümidte."

Resul qurbanof özining naxshichi bolup yétilishige ataqliq Uyghur sen'etkarlirining qattiq tesir qilghanliqini bildürüp, yene mundaq dédi: "Birinchi nöwette, awazi bulbuldek, xelqimizge keng tonulghan nur'alim warisof, andin rustem niyazof we bashqilar. Wetendiki sen'etkarlar arisida abdulla abduréhim, nurnisa abbas, möminjan ablikimning naxshilirini bek séghinip tingshaymen. Men köpinche ammibab naxshilarni éytimen. Biraq axirqi waqitlarda xelq naxshilirighimu köp köngül bölüwatimen. Hazir bolsa wetende özini köp tonutqan saniyem isma'ilning dersige bériwatimen. Saniyem hedining manga sehnide özini tutushi nahayiti yaqidu." 

Resul qurbanof özining mundaq utuqqa yétishige birinchi nöwette ata-anisining, ayrim sen'etkarlarning we bashqilarning seweb bolghanliqini éytip, ulargha özining cheksiz minnetdarliqini bildürdi.

Ziyaritimizni qobul qilghan "Alamet" filim ishlesh merkizining mudiri qelbinur roziyéwaning éytishiche, qazaqistanliq Uyghurlar resul qurbanofning érishken utuqini chong xushalliq bilen qarshi alghan. U bügünki künde qazaqistandiki muzika, tiyatir, kino sen'itining tereqqiyatigha öz töhpilirini qoshuwatqan Uyghurlarning köplep sanilidighanliqini, shularning ichide "Derwishler", "Yarkent bulbulliri", "Diyar", "Nur" qatarliq sen'et guruppiliri bilen bir qatarda yekke naxshichilarningmu bar ikenlikini ilgiri sürüp, mundaq dédi: "Qazaqistan ammibab sen'itige bir kishilik hessisini qoshup kéliwatqan gülsenem meshurowa özining chirayliq awazi bilen ürümchi shehiride ötken 'yipek yoli sadasi' ghimu qatniship kelgen. Özining alahide uslubliri bilen Uyghur ammibab naxshichiliqigha qedem teshrip qilghanlarning yene biri erkin abduwajitoftur. Yash ewladlirimizdin biri irade mamutowani atighum kélidu. U köpligen musabiqilerde ghalip atilip, qazaqistandiki eng eqilliq, eng talantliq bala dégen namgha ige bolup, médal we diplomlar bilen mukapatlandi. Men özlirini sen'etke bolghan cheksiz muhebbiti bilen uning güllinishige hesse qoshuwatqan yash cholpanlirimizgha peqet apirin deymen."

Bir qatar sen'et musabiqilirining cholpini resul qurbanof 1993-yili almuta wilayitining emgekchiqazaq nahiyisige qarashliq chélek yézisida tughulghan. Ottura mektepni talghir nahiyisining güldala yézisida Uyghur tilida tamamlighan. Sen'etke kichikidin bashlap qiziqqan u mektepni tamamlighandin kéyin almuta shehiridiki chaykowskiy namidiki sen'et mektipide bilim alghan. U Uyghur élining ürümchi shehiride bolup, ikki yil mabeynide xitay tilini ögen'gen hem shu jehette "Yipek yoli sadasi" musabiqisige qatnashqan. Musabiqide u abdulla abduréhim, nurnisa abbas we bashqimu ataqliq sen'etkarlar bilen tonushup, ulardin yaxshi sawaq alghan.

Toluq bet