Muhajirettiki Uyghurlarda namayish qizghinliqi ewj almaqta

Ixtiyariy muxbirimiz ekrem
2018-01-29
Élxet
Pikir
Share
Print
Xotendiki melum yépiq terbiyelesh orni.
Xotendiki melum yépiq terbiyelesh orni.
Social Media

Xitayning chékidin ashqan zulumi muhajirettiki Uyghurlarni qozghilip qarshiliq körsitishke mejburlimaqta.

Dunya Uyghur qurultiyining mu'awin re'isi perhat muhemmidining qarishiche, xitay hakimiyitining Uyghur diyarida yürgüzüwatqan éghir basturush siyasiti muhajirettiki Uyghurlarning özlükidin qozghilip qarshiliq körsitishige türtke bolmaqta iken.

Igilinishiche, d u q ning orunlashturushi bilen, 27-yanwar yawropadiki 10 gha yéqin dölette pa'aliyet élip bériwatqan Uyghur teshkilatlirining rehberliri téléfon yighini chaqirip, 4-ayning 27-küni yawropa parlaménti aldida élip bérilidighan 5 ming kishilik namayish üchün teyyarliq komitéti qurup chiqqan.
22-Yanwar küni dunya Uyghur qurultiyining tor béti we ijtima'iy taratqularda "Yawropa parlaménti aldida 5 ming kishilik namayish chaqiriqi" élan qilin'ghan. Mezkur chaqiriqta "D u q ning teshebbusi bilen yawropa döletliridiki Uyghur jama'itining küchini asas qilghan bu pa'aliyetni wakaletsiz milletler teshkilati qatarliq xelq'ara teshkilatlar, gérmaniye, norwégiye, gollandiye, shiwétsiye, shwétsariye, en'gliye, firansiye, bélgiye we finlandiyediki Uyghur teshkilatliri we jama'et wekilliri hemde siyasiy aktiplar birlikte teshkilleydu. Bu namayishqa yawropadiki türk we bashqa qérindash milletler, Uyghur dawasigha hésdashliq qiliwatqan yawropaliq dostlarmu keng da'iride seperwer qilinidu," déyilgen idi.

Chaqiriqta yene "Yawropadiki bu namayishqa qatnishish imkaniyiti bolmighan shimaliy amérika, awstraliye, türkiye we yaponiye qatarliq qit'e we döletlerdimu oxshash bir künde namayish élip bérilidu," dégen ibarilerge yer bérilgen.

D u q ning bu chaqiriqi élan qilin'ghandin kéyin, yawropa döletliride bu namayishqa qatnishish üchün Uyghur jama'iti pa'al heriketke kelgen. Norwégiye Uyghur komitétining re'isi bextiyar ömer ependi bu heqte ziyaritimizni qobul qilghanda, norwégiyediki 50 tin artuq kishining bu namayishqa qatnishish üchün aldin ayropilan biletlirinimu élip bolghanliqini bayan qildi.

Fransiyediki Uyghurlarmu özlükidin teshkillinip namayish hazirliqini bashlighan. Firansiye Uyghur jem'iyitining mes'ulliridin ekber ependi bu heqte toxtalghanda, fransiyediki Uyghurlarni teshkillesh üchün héchqandaq teshkiliy pa'aliyet bolmighanliqini, emma Uyghur jama'itining özlükidin qozghiliwatqanliqini tilgha aldi.

D u q ning mu'awin re'isi perhat muhemmidining éytishiche, muhajirettiki Uyghur jama'iti yene "5-Féwral ghulja weqesi" ning 21 yilliqini xatirilesh namayishi we Uyghur ayalliri teshkillewatqan 15-mart ayallar namayishigha hazirliq qiliwatqan bolup, 2018-yilining muhajirettiki Uyghurlar omumyüzlük qozghalghan bir yil bolup qélishi mumkin iken.

Toluq bet