Gherb metbu'atlirida xitay emeldarliridiki chiriklishish keypiyati heqqide inkaslar

Emma xitay weziyitini közitip kéliwatqan xelq'ara metbu'atlarda pikir bayan qilghan siyasiy analizchilar bolsa, bundaq belgilimilerning xitay emeldarliridiki parixorluq, chiriklik qilmishlirini tosup qalalmaydighanliqini tekitlimekte.

Xitay merkizi komitéti teripidin jaylargha tarqitilghan kadirlar intizami belgilimiside, “Beshni men'i qilish, 17 ge ruxset qilmasliq, beshte birdek bolush” dégen mawzu qoyulghan bolup, belgilimide “Awaz toplap, para bérip saylinish, emel sétish-sétiwélish, emel sorash-emel telep qilish, belgilimige xilap adem ishlitish, nöwet almishishqa kashila qilish qatarliqlar méni qilinidu” dégen belgilimiler bayan qilinip, xitay kadirliridiki parixorluq, chiriklik qilmishlirining yamrap kétishining aldini élishta, xitaydiki her bir hökümet kadirining awwal bu belgilimilerge shertsiz emel qilishi telep qilin'ghan.

Xitay rehbiri shi jingping yene 22-yanwar seyshenbe küni échilghan merkizi intizam tekshürüsh komitétining yighinida söz qilip, xitayda hökümet emeldarliridiki parixorluq, chiriklik qilmishlirining éghirliqini bayan qilip, bu ehwalning xelqning naraziliqini qozghighan muhim amillarning biri ikenlikini tekitlep, chiriklik, parixorluq qilmishlirigha zerbe bérilidighanliqini bildürgen.

Xitayning shinxu'a agéntliqi, xelq géziti qatarliq hökümet metbu'atliri xitay re'isi shi jingpingning sözi we merkizi intizam tekshürüsh komitéti élan qilghan belgilimiler heqqide élan qilghan xewerliride buning shi jingping rehberlikidiki yéngi rehberlik guruhining xitay emeldarliridiki chiriklishish, parixorluq qilmishlirini tüp yiltizidin yoqitish iradisining mustehkemlikini medhiyilidi.

Emma, b b s agéntliqi, erkin asiya radi'osi, gérmaniye awazi qatarliq gherb metbu'atliri shundaqla boshün, yéngi ira qatarliq chet'ellerdiki xitay démokratlirining tor béketliride xitay weziyitini közetküchi analizchilar bu heqtiki qarashlirini otturigha qoyup, yéngidin hakimiyet béshigha chiqqan shi jingping bashchiliqidiki xitay hökümitining xitay emeldarliri arisida alliqachan omumiy keypiyatqa aylinip bolghan, kishilik munasiwet torigha asasen emeldar teyinlesh, emel sétiwélish, emel sétish, para élish qilmishlirini merkizi komitét namidin élan qilghan belgilime-qa'idiler؛ parixorluq-chiriklik qilmishliri xelqqe ashkarilinip ketken birqanche emeldarlarni jazalash yolliri bilen tosup qalalmaydighanliqini tekitlidi.

En'gliye b b s agéntliqining xewiride xitayda chiqidighan iqtisadqa nezer gézitidin neqil élinip, yéqindin buyan, xitaydiki 45 sheherde bahasi 10 milyon somdin yuqiri bolghan heshemetlik öy ‏-jaylarning bashqilarning namigha yötkesh, öy igisi qol qoymighan halette öyini bashqilar arqiliq neq pulgha sétish, turalghu jaylarni toxtam tüzmestinla yéqinlirigha ijarige bériwétishtek gheyriy normal haletning ewj alghanliqi bayan qilinip, buning bir qisim xitay emeldarlirining xitay merkizi komitéti élan qilghan parixorluq, chiriklik qilmishlirigha zerbe bérish dolqunidin saqlinip qélish üchün éliniwatqan tedbir ikenliki ilgiri sürüldi.

Chet'ellerdiki xitay démokratlirining tor békiti boshün torida élan qilin'ghan 24-yanwar küni chungching shehiride bir kün ichidila yuqiri derijilik hökümet emeldarliridin 10 kishining wezipisidin qaldurulghanliqi heqqidiki xewerde, nöwette xitayda élip bériliwatqan emeldarlarning chiriklishishige zerbe bérish shamilida torgha chüshkenlerning emeliyette nahayiti az sandiki arqa tiriki bolmighan bir qisim emeldarlar ikenliki ilgiri sürülüp, parixorluq, chiriklik qilmishi téximu éghir bolghan yuqiri derijilik hökümet emeldarlirining yenila hakimiyet üstide ikenliki tekitlendi.

Bügün 24-yanwar küni erkin asiya radi'osining ziyaritini qobul qilghan shendung uniwérsitétining proféssori sün wén'gu'ang ependi xitay rehbiri shi jingpingning 22-yanwar seyshenbe künidiki sözide tekitligen xitay emeldarlirining chiriklishish yolini tosash chaqiriqi we xitay merkizi komitéti chiqarghan kadirlar intizami belgilimisi qatarliqlarning emeliyette xitayda omumiy keypiyatqa aylan'ghan chiriklik qilmishini tüp yiltizidin tügitelmeydighanliqini bildürdi.

U mundaq dédi:
-Xitaydiki siyasiy tüzülmining özi xitay emeldarlirining chiriklishish, parixorluq qilmishlirigha yol achidighan tüzüm. Xitay hökümiti yillardin buyan her xil belgilime-qa'ide, tüzümlerni élan qilip kéliwatidu. Elwette parixorluq, chiriklik qilmishliri tor béketliride awamgha ashkarilinip ketken bir qisim emeldarlarni jazalash arqiliq, xelqqe hökümetning chiriklik,parixorluq qilmishlirigha zerbe béridighanliqini körsitishke urunuwatidu. Yéqindin buyan gu'angju qatarliq sheherlerde hökümet emeldarlirining mal-mülkini ashkarilash tüzümining sinaq teriqiside yolgha qoyulidighanliqinimu teshwiq qiliwatidu. Emma, kompartiyidin ibaret bir partiye hakimiyet béshida bolidighan, öktichi partiye -guruhlarning nazariti bolmighan bundaq bir partiyilik hakim mutleqliq tüzüm yürgüzülüwatqan dölette, sizningche, hökümet emeldarlirining chiriklishishini tosup qalghili bolamdu? chünki, chiriklishishning esli menbesi héchqandaq cheklime qoyulmaydighan mutleq hakim mutleqliq tüzümning özi. Bu pütkül dunya étirap qilghan heqiqet.