Xitay enqerede oyushturghan noruzda 40 Uyghur oqughuchigha 1000 dollardin pul tarqatqan

Xitayning türkiye elchixanisi 3 - ayning 19 - küni enqere shériton méhmanxanisida noruz pa'aliyiti ötküzüp, bu pa'aliyetke qatnashqan 40 Uyghur oqughuchigha ming dollardin oqush mukapat puli tarqatqan. Bulardin bashqa yene oqush netijisi yaxshi 7 oqughuchigha pul tarqatqan. Xitay elchixanisi, enqerede oyushturghan bu pa'aliyetke istanbuldin mexsus aptobus ijarige élip, yataq we tamaq pullirini bérip oqughuchi élip kélip qatnashturghan.

Xitayning Uyghurlargha élip bériwatqan bésim siyasiti künsayin éshiwatqan bundaq bir künde enqerediki xitay elchixanisining Uyghur oqughuchilarni yighip pul tarqitishi türkiyede pa'aliyet élip bériwatqan sherqiy türkistan ammiwiy teshkilatliri bilen türkiyediki bezi Uyghurlarning qattiq naraziliqini qozghidi.

Bu pa'aliyetke qatnashqan kishilerdin igiligen melumatqa asaslan'ghanda, xitay elchixanisi enqere shéritonda noruz pa'aliyiti oyushturghan katta méhmanxanining koridorigha xitay dölitining xitaydiki islam dini, Uyghurlar toghrisidiki kitab we teshwiqat resimliri qoyulghan bolup, resimde qeshqer, ürümchi we turpandiki meschit resimliri, meschitte namaz qiliwatqan Uyghurlarning resimliri we Uyghur diyarining güzel menziriliri ekis ettürülgen resimler tizilghan. Bu pa'aliyetke istanbul, enqere, konya, eskishehir, sakarya qatarliq jaylarda oquwatqan Uyghur oqughuchilar we xitay shirkitide ishlewatqan bezi Uyghurlardin sirt, az sanda türk we qazaqlarmu qatnashqan.

Xitayning enqerediki bash elchisi yü xungyang Uyghur oqughuchilardin bir - birlep hal sorap, balilirini élip kelgen Uyghurlarning balilirini söyüp qoyghan. Bu pa'aliyetke qatnashqan bezi közetküchiler xitayning bu pa'aliyetni oyushturushtiki meqsitige yetkenlikini, chünki xitay dölitining Uyghurlar toghrisida chet'ellerde élip bériwatqan tetur teshwiqatini yene bir qétim enqerede ijra qilghanliqini éyitti. Xitay elchisi bu yighinda qilghan nutqida türkiyede Uyghur oqughuchilargha hazirghiche 400 ming dollar etrapida yardem puli tarqatqanliqini éytqan.