Xitay herbiy paraxotlirining heywe körsitish üchün shiwétsiyege kelgenliki ilgiri sürüldi

Shiwétsiyening her qaysi metbu'atlirida xewer qilishiche, xitayning 3dane herbiy paraxoti shiwétsiye paytexti sitokholmdiki sulussun portigha 1-öktebir yétip keldi.

Igilishimizche, xitay da'irilirining bu paraxotliri sumaliye bilen yemen ariliqidiki déngiz yoli bixeterlikini qoghdawatqan bolup, wezipe ötesh waqti toshup xitaygha qaytish yolida shiwétsiyege kelgen.

Xitay da'irilirining bu herbiy paraxotliri xitayning dölet bayrimi künige udullap hemde shiwétsiyede xitaygha qarshi élip béridighan teshkilatlarning namayishqa toghrilan'ghanliqi alahide diqqet chekmekte.

Shiwétsiye mudapi'e ministirliqining qarmiqidiki mudapi'e qisimning bayanatchisi mika'il ebremson ependining bügün shiwétsiye axbaratida ashkarilishiche, mezkur herbiy paraxotlarning biri normal hujumchi paraxot, yene biri bolsa tiz sür'etlik alahide hujumchi paraxot we bir dane qutquzush paraxotidin teshkil tapqanliqi, mezkur herbiy paraxotta jem'iy 800 neperge yéqin xitay eskiri barliqini ilgiri sürüldi.

Ebremson ependining déyishiche, bu tunji qétim xitay herbiy paraxotining shiwétsiye tewelikige ziyaret qilishi iken, shundaqla bu xil ziyaret tasadipiy bolsimu, normal ziyaret hésablinidiken.

Shiwétsiye hökümiti téxi yéqinda xitay we rusiye istixbarati üstidin shikayet qilip, shiwétsiyening su asti herbiy paraxot téxnikilirigha xitayning köz tashlawatqanliqi we xitay jasuslirining shiwétsiyede panahliniwatqan Uyghurlar we Uyghur teshkilatlirini yéqindin teqib qiliwatqanliqini otturigha qoyghan turup, xitayning herbiy paraxotlirini muhim déngiz teweliki yene kélip paytext porti rayonlirigha bashlap ziyaret qildurushi közetküchilerning diqqitini tartmaqta.

Bu qétimliq xitay da'irilirining herbiy paraxotliri ziyariti shiwétsiyediki axbarat wasitiliride qiziq munazire témisi bolmaqta.

Shiwétsiyediki bezi analizchilarning qarishiche, xitay herbiy paraxotlirining shiwétsiye portlirida orun élishi shiwét xelqining kallisida her xil so'allarning peyda bolushigha seweb bolghanliqini, hazirqi hökümet da'iriliriningmu xelqining endishisini yoq qilish üchün, axbarat wasitiliride qayta-qayta bu bir normal sayahet sheklidiki bir ziyaret ikenlikini tekitlimekte.

Analizchilar birdek qarishiche, hazirqi hökümetni bashquruwatqan sotsiyal partiyisidin bolghan bash ministir sitiwan lowning bash ministir bolghandin kéyin xitay hökümiti bilen bolghan alaqining kücheygenlikini ilgiri sürdi.

Shiwétsiyede pa'aliyet qiliwatqan Uyghur ma'arip uyushmisining bash katipi abdulla ehet ziyaritimizni qobul qilip, özining xitay herbiy paraxotlirining shiwétsiyege kirgendin buyan xewerlerni yéqindin közitip turush bilen birge, paraxot toxtitilghan portqa bérip yéqindin közitip tetqiq qilghini hemde shiwétsiyede xitaygha qarshi pa'aliyetler küchiyiwatqan mushundaq mezgilge toghrilap shiwétsiyege kélishini, xitay da'irilirining qandaq pilan meqsiti barliqi kishini oylandurghan we diqqet qilishqa tégishlik muhim mesile ikenlikini tekitlep mundaq dédi.