Xitayning it göshi yéyish féstiwaligha qarshi istanbulda namayish ötküzüldi

21 - Iyun düshenbe küni xitayning lyawning ölkisi yülin shehiride xitaylarning it göshi yéyish féstiwali ötküzülgen. Bu féstiwalda xitayning nechche yüzligen itni öltürüp yégenliki bildürüldi.

22 - Iyun seyshenbe küni merkizi istanbulgha jaylashqan haywan heqliri fédératsiyesining uyushturushi bilen kech sa'et 19:30 da xitayning istanbulda turushluq konsulxanisi aldida xitayning it göshi yéyish féstiwaligha qarshi namayish ötküzüldi.

Qollirida it - müshüklerning resimlirini kötürüwalghan haywansüyer namayishchilar xitay konsulxanisi aldida “Xitay wehshiylikni toxtat” dégen'ge oxshash her xil sho'ar towlidi.

Namayishchilar qollirida, “Dunyaning pütün palaketliri yülinning üstige bolsun!”, “Pütün itlar bizning dostlirimiz ular yéyilmeydu!”. “Insan, haywan we tebi'et qatilliqi yoqalsun!”, “Xitay iskenjisi, zulumni toxtat!”, dégen'ge oxshash chong xetler yézilghan plakat kötürgen.

Haywan heqliri fédératsiyesi we namayishchilargha wakaliten adwokat exmet kamal shenpolat ependi bayanat élan qildi we namayish qilishtiki meqsitini ipadilep mundaq dédi: bu yerge kélishtiki meqset, xitayning uzun yillardin buyan dawam qildurup kéliwatqan peqetla haywanlargha qarshi emes belki insanlargha, tebi'etke we muhitqa qarshi yürgüzüwatqan heq we hoquq depsendichiliklerge qarshi namayish qilish üchün toplanduq. Yülin peqet bulardin biri, xitayning oxshimighan jaylirida yilda 365 kün dawam qiliwatqan it, müshüktin tartip bowaqlar we insanlarghiche qiliniwatqan wehshiylikke, tebi'etning buzghunchiliqqa uchrishigha, muhitning bulghinishigha qarshi turush üchün biz bu yerge jem bolduq.

Namayish axirida namayishchilar xitayning it göshi yéyish pa'aliyitige qarshi tuyghuliri ipadilen'gen waraqchilarni toplap, “Toxta xitay” dégen xet yézilghan bir sanduqqa saldi we ikki namayishchi sanduqni xitay konsulxanisining aldigha qoydi.