Pakistandiki xitay elchisining ziyapitige bezi Uyghurlarmu qatnashti

Islamabadtiki xitay elchixanisining tor bétide körsitilishiche, islamabadtiki xitay elchixanisige téxi yéqinda bash elchilikke teyinlen'gen sun wédung pakistandiki xitay muhajirliri bilen uchirishish ziyapiti ötküzgen. Pakistandiki bir qisim Uyghurlarning bildürüshiche, uchirishish ziyapitige shu yerdiki bir qisim Uyghurlarmu qatnashqan.

Bu qétimqi ziyapetke pakistanda xizmet qiliwatqan xitay puqraliri, oqughuchilar we xitay muhajirliridin bolup,jem'iy yüzdin oshuq kishi qatnashqan.

Emma tor bétidiki xewerde, Uyghurlarning xitay elchixanisidiki uchirishish ziyapitige qatnashqanliqi toghrisida éniq uchur bérilmigen.

Xitay elchixanisining uchurida déyilishiche, uchirishish ziyapitide söz qilghan xitay elchisi sun wédung pakistandiki xitay muhajirlirining pakistandiki xitay

Elchixanisining xizmetlirige yéqindin yardemde bolushini kütidighanliqini we pakistan bilen xitayning uzaq muddetlik sinaqlardin ötken, qérindash qoshna döletlerdin ikenlikini bildürgen.

Bash elchi sun wédung sözide rayon bixeterliki, xitayning zémin pütünlüki, xitayning tereqqiyati qatarliq mesililerde xitay xelq jumhuriyitining pakistandiki xitay muhajirlirining köp tereplimilik yardimige muhtajliqini bildürgen. U ziyapette, xitayda élip bériliwatqan “Xitayning chüshi” namliq tereqqiyat pa'aliyitige pakistandiki xitay muhajirliriningmu aktip qatnishishini, xitayning chüshining ri'alliqqa aylinishi üchün hemmining birdek küch chiqirishini ümid qilidighanliqini bildürgen.

Bash elchi sun wédung sözide xitay puqralirining pakistanda xatirjem, erkin - azade tijaret qilishi, xoshal - xoram turmush kechürishi üchün ularning bixeterlik mesililiride xitay hökümiti yenila pakistandiki xitay muhajirlirining qollishigha, qimmetlik uchurlar bilen teminlishige muhtajliqini tekitligen. Bash elchi bu jehette xitay muhajirlirining xitay elchixanisining xizmitige yéqindin maslishishini bildürgen. Ziyapette pakistanning her qaysi ölke, sheherliridiki xitay muhajirlar jem'iyitining wekillirimu söz qilghan.

Wekiller sözide pakistandiki xitay elchixanisigha yéngidin bash elchilikke teyinlen'gen sun wédungning xizmitini birdek qollaydighanliqini bildürüshken.

Bu qétimqi bash elchi sun wédungning xitay muhajirliri bilen uchrishish ziyapitige pakistanning islamabad, rawalpindi, gilgit qatarliq sheherliridiki Uyghurlardinmu wekiller qatnashqan. Islamabadqa besh yüz nechche kilométir uzaqliqtiki qeshqer bilen chégrilinidighan taghliq rayon gilgittin qeyum, rawalpindidin ablikim haji, islam'abadtin rizaxan bashchiliqida bir qisim Uyghurlar qatnashqan.

Bizge uchur bergen pakistandiki bir Uyghur bu heqte toxtilip ötti:

Ziyartimizni qobul qilghan, emma özining isim familisini ashkarilashni xalimighan pakistandiki bu Uyghurning bildürüshiche, ular ilgiri xitay elchixanisining pa'aliyiti toghrisida erkin asiya radi'osigha uchur bergenliki we ziyaritini qobul qilghanliqi sewebidin pakistan bixeterlik organlirining xadimliri kéchide öyige basturup kirip, tehdit salghan.

Ziyaritimizni qobul qilghan bu Uyghur, xitay elchixanisi bixeterlik organlirigha ularning üstidin erz sun'ghanliqinimu bildürdi. U, bu heqte toxtilip ötti.

Pakistandiki Uyghurlarning bildürüshiche, gilgittin kelgen qeyum isimlik Uyghur ilgiri özining körsetken xizmiti üchün köp qétim xitay elchixanisi teripidin maddiy we meniwiy jehette mukapatlargha érishken.

Rawalpindidiki Uyghurlarning inkasigha qarighanda, rawalpindidin bu qétimqi ziyapetke ishtirak qilghan wekil ablikim haji ilgiri béyjing chet'el tili uniwérsitétida xitay tili ügen'gen, ilgiri xitaydiki qacha - qucha shirketliri bilen birlikte hemkarliship soda qilghan.

Awaz ulinishidin tepsilatini anglang.