Шиветсийә баш министири: хитайни сода һәмкарлиқини күчәйтиш арқилиқ демократийигә йетәкләймиз

Ихтиярий мухбиримиз иһсан
2017.06.30
Stefan-and-Xi.jpg Шиветсийә баш министири бәиҗиңда. 2017-Йили 26-июн.
www.news.cn

Шиветсийә баш министири ситиван ливин 6-айниң 26-күнидин 28-күнигичә хитайда зиярәттә болди.Бу қетимлиқ зиярәт шиветсийә тарихидики хитайға қарита зиярәтләр ичидики көлими бир қәдәр чоң болған зиярәт болғачқа, шиветсийә ахбаратлириниң диққитини тартти.

Баш министир стиван ливин зиярәткә меңиштин бурун мухбирларни күтүвелиш йиғинида қилған сөзидә, хитай һөкүмити рәһбәрлири билән учрашқанда тайландтин тутуп кетилгән шивет пуқраси гуй минхәйниң қоюп берилиши һәққидә мунасивәтлик орунлар билән көрүшидиғанлиқини билдүргән.У сөзидә шиветсийә һөкүмитиниң хитай ширкәтлириниң мәбләғ селишиға еһтияҗлиқ икәнликини, хитай даирилириниңму шиветсийәниң пән-техникисиға еһтияҗи барлиқини билдүрди. 

Шиветсийә баш министири бу қетимлиқ хитай зиярити җәрянида “җили ширкити” һәмдә “алий ба ба” гуруһи билән нурғун соммилиқ тохтам түзүп кәлгән.Шиветсийәдә паалийәт қиливатқан “уйғур маарип уюшмиси” баш министир стиван ливин хитайға зиярәткә бериштин бурун шиветсийә ташқи ишлар министирлиқиға уйғур вәзийитиниң йеқинқи әһвалдин доклат йезип, баш министирдин хитай рәһбәрлири билән көрүшкәндә бу мәсилиләрни оттуриға қоюшни тәләп қилған.

Бу һәқтә тохталған уйғур маарип уюшмисиниң баш катипи аббас әпәнди өз қарашлирини билдүрди.Зияритимизни қобул қилған түркийә һаҗитәпә университетиниң тарих оқутқучиси әркин әкрәм әпәнди хитай даирилириниң явропани мәркәз қилған һалда көпләп мәбләғ селиватқанлиқи һәққидики соалимизға қарита көз қаришини ипадилиди.

Әркин әкрәм сөзидә, хитай даирилириниң йеңи йипәк йоли пилани бойичә, хитайни явропа билән бағлап, җаһангирлик мәқситигә йәтмәкчи икәнликини билдүрди.Уйғур маарип уюшмисиниң баш катипи аббас әпәнди шиветсийә һөкүмитиниң хитай даирилири билән нормал мунасивәтни сақлаш арқилиқ хитайниң демократийигә өтүшигә ярдәм қилидиғанлиқини изаһлиди.

Доктор әркин әкрәм сөзидә йәнә, хитай даирилириниң явропада иқтисади васитә арқилиқ елип бериватқан һәрикитиниң кеңийишигә әгишип, явропада елип бериватқан шәрқий түркистан давасиға тәсир йетидиғанлиқи тоғрисидики әндишисини баян қилди.

Ахирида доктор әркин әкрәм, явропада хитайниң иқтисадий кеңәймичилики сәвәблик келип чиқидиған кризисқа қарита, уйғур тәшкилатлириниң муһим болған хизмәтләрни һәмкарлишип елип бериши һәққидики өз тәклипини оттуриға қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.