Алҗирийидики тутқунда өлтүрүлгән японларниң җәсити японийигә қайтуруп келинди

Өткән һәптидә алҗирийидики террорчилар тәрипидин тутқун қилинип өлтүрүлгән 10 нәпәр японлуқниң 9 кишиниң җәсити алҗирийидин мәхсус айропилан токйоға елип келинди.
Ихтиярий мухбиримиз қутлуқ
2013.01.25
yaponiye-algeriye-wapat-bolghan-toqquz-305.png Алҗирийәдә вапат болған японийәликләр тоғрисидики гезит хәвири
RFA/Qutluq


японийә баш вәзири шинзо абе бу қетимқи вәқәни “наһайити қорқунчлуқ” дәп тәриплиди һәмдә өзиниң вәқәдә вапат болғанларға тәзийә билдүридиғанлиқини шундақла уларниң аилә тавабиатлиридин һал сорайдиғанлиқни билдүрди. Алҗирийидә өлтүрүлгән японлуқларниң җәсити бүгүн токйоға елип келингәндин кейин нурғунлиған японлуқлар, японийә җәмийитидики бәзи кишиләрниң ислам диний билән террорлуқни бир - биригә четип, кишиләрдә ислам диниға болған хата уқумниң пәйда болуп қилишидин шундақла японийә җәмийитидә яшаватқан мусулманларға кишиләрниң башқичә көз қарашта болуп қилишидин әндишә қилидиғанлиқини билдүрди. Бу һәқтә өзиниң шәхсий көз қаришини баян қилған кана ханим мундақ деди:

- Алҗирийидә өлтүрүлгәнләрниң вәқәси наһайити ечинишлиқ вәқә, мән наһайити азапландим. Бәзи японларниң ислам диний билән бу қетимқи вәқәни пәрқ қилалмай, хата чүшәнчә пәйда қиливелишидин әнсирәш билән биргә, японийә җәмийитидики мусулманларға әкс тәсир берип қилишидин әндишә қиливатимән.

Алҗирийиниң шәрқидики бензин ширкитидә хизмәт қиливатқан японийә газ ширкитиниң хизмәтчи хадимлиридин 17 нәпири өткән һәптә алҗирийидики 37 нәпәр чәтәлликни тутқун қилиш вәқәсидә тутқун қилинған иди. Вәқә йүз бәргәндин кейин японийә баш вәзири шинзо абе дәрһал өзиниң алаһидә вәкили, японийә ташқи ишлар министирлиқиниң муавин министири шуничи сузукини мәхсус айропилан билән алҗирийигә әвәтип, алҗирийә тәрәп билән сөһбәт өткүзүшкә, вәқәдә өлүп кәткәнләрниң җәситини японийигә қайтуруп келишкә әвәткән иди.

Бу қетимқи вәқәдә өлтүрүлгәнләрниң һәммиси баш шитаби йокохамадики японийә җ г к газ ширкитиниң хадимлири болуп, буларниң ичидә мәзкур ширкәтниң сабиқ баш директори 66 яшлиқ таданори әпәндиму вәқәдә өлтүрүлгән.

японийә тәрәп вәқәни тәпсилий тәкшүрүш, алҗирийә тәрәп билән ичкирилигән һалда сөһбәт елип бериш үчүн японийә ташқи ишлар министирлиқиниң мәсуллиридин минору киучи әпәндини алҗирийидә давамлиқ турушқа, башқа тутқун қилинған японларниң әһвалини көзитишкә орунлаштурған.

японларниң инкасиға қариғанда, японийә һөкүмитиниң чәтәлдики тутқун қилиш вәқәсидә өлгән өз пуқралириға тунҗи қетим мәхсус айропилан әвәтип, өлгәнләрниң җәситини йөткиши тунҗи қетим икән. Шуңа нурғунлиған японлар йеңидин баш вәзирликкә тәйинләнгән шинзо абениң өз пуқралириға болған мәсулйәтчанлиқ туйғусидин толиму рази болуш билән биргә японийә баш вәзири шинзо абегә өз тәшәккүрлирини билдүргән.

Алҗирийидә өлтүрүлгән японларниң җәситиниң токйоға йетип келиши, җүмә күни йәни японийидики мусулманларниң йеғилип җүмә намизини оқуйдиған күнигә тоғра кәлгәчкә, бүгүнки җүмә намизи қутбисидә һәр қайси мәсчитләрдики имамлар, японийидә яшаватқан мусулманларни, бу вәқәни японлуқ достларға наһайити инчикилик вә еһтиятчанлиқ билән чүшәндүрүшкә дәвәт қилған. Зияритимизни қобул қилған японийидә яшаватқан пакистанлиқ мусулманлардин доктор авзал әпәнди өзиниң бу қетимқи вәқәгә болған қаришини билдүрүп өтти.

Бу қетимқи вәқәниң йүз бәргәнликигә бәкму ечинимән. Мәйли қайси динда болмисун, инсанларниң бир - бирини өлтүрүши бизниң динимизға хилап, гунасиз инсанларни өлтүрүшни һечқандақ бир дин қобул қилалмайду.

Һазир японийидә яшаватқан уйғур сиясий көзәткүчиләрдин доктор турмуһәммәт өзиниң бу қетимқи вәқәдин қаттиқ қайғурғанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.