Aljiriyidiki tutqunda öltürülgen yaponlarning jesiti yaponiyige qayturup kélindi

Yaponiye bash weziri shinzo abé bu qétimqi weqeni “Nahayiti qorqunchluq” dep teriplidi hemde özining weqede wapat bolghanlargha teziye bildüridighanliqini shundaqla ularning a'ile tawabi'atliridin hal soraydighanliqni bildürdi. Aljiriyide öltürülgen yaponluqlarning jesiti bügün tokyogha élip kélin'gendin kéyin nurghunlighan yaponluqlar, yaponiye jem'iyitidiki bezi kishilerning islam diniy bilen térrorluqni bir - birige chétip, kishilerde islam dinigha bolghan xata uqumning peyda bolup qilishidin shundaqla yaponiye jem'iyitide yashawatqan musulmanlargha kishilerning bashqiche köz qarashta bolup qilishidin endishe qilidighanliqini bildürdi. Bu heqte özining shexsiy köz qarishini bayan qilghan kana xanim mundaq dédi:

- Aljiriyide öltürülgenlerning weqesi nahayiti échinishliq weqe, men nahayiti azaplandim. Bezi yaponlarning islam diniy bilen bu qétimqi weqeni perq qilalmay, xata chüshenche peyda qiliwélishidin ensiresh bilen birge, yaponiye jem'iyitidiki musulmanlargha eks tesir bérip qilishidin endishe qiliwatimen.

Aljiriyining sherqidiki bénzin shirkitide xizmet qiliwatqan yaponiye gaz shirkitining xizmetchi xadimliridin 17 nepiri ötken hepte aljiriyidiki 37 neper chet'ellikni tutqun qilish weqeside tutqun qilin'ghan idi. Weqe yüz bergendin kéyin yaponiye bash weziri shinzo abé derhal özining alahide wekili, yaponiye tashqi ishlar ministirliqining mu'awin ministiri shunichi suzukini mexsus ayropilan bilen aljiriyige ewetip, aljiriye terep bilen söhbet ötküzüshke, weqede ölüp ketkenlerning jesitini yaponiyige qayturup kélishke ewetken idi.

Bu qétimqi weqede öltürülgenlerning hemmisi bash shitabi yokoxamadiki yaponiye j g k gaz shirkitining xadimliri bolup, bularning ichide mezkur shirketning sabiq bash diréktori 66 yashliq tadanori ependimu weqede öltürülgen.

Yaponiye terep weqeni tepsiliy tekshürüsh, aljiriye terep bilen ichkiriligen halda söhbet élip bérish üchün yaponiye tashqi ishlar ministirliqining mes'ulliridin minoru ki'uchi ependini aljiriyide dawamliq turushqa, bashqa tutqun qilin'ghan yaponlarning ehwalini közitishke orunlashturghan.

Yaponlarning inkasigha qarighanda, yaponiye hökümitining chet'eldiki tutqun qilish weqeside ölgen öz puqralirigha tunji qétim mexsus ayropilan ewetip, ölgenlerning jesitini yötkishi tunji qétim iken. Shunga nurghunlighan yaponlar yéngidin bash wezirlikke teyinlen'gen shinzo abéning öz puqralirigha bolghan mes'ulyetchanliq tuyghusidin tolimu razi bolush bilen birge yaponiye bash weziri shinzo abége öz teshekkürlirini bildürgen.

Aljiriyide öltürülgen yaponlarning jesitining tokyogha yétip kélishi, jüme küni yeni yaponiyidiki musulmanlarning yéghilip jüme namizini oquydighan künige toghra kelgechke, bügünki jüme namizi qutbiside her qaysi meschitlerdiki imamlar, yaponiyide yashawatqan musulmanlarni, bu weqeni yaponluq dostlargha nahayiti inchikilik we éhtiyatchanliq bilen chüshendürüshke dewet qilghan. Ziyaritimizni qobul qilghan yaponiyide yashawatqan pakistanliq musulmanlardin doktor awzal ependi özining bu qétimqi weqege bolghan qarishini bildürüp ötti.

Bu qétimqi weqening yüz bergenlikige bekmu échinimen. Meyli qaysi dinda bolmisun, insanlarning bir - birini öltürüshi bizning dinimizgha xilap, gunasiz insanlarni öltürüshni héchqandaq bir din qobul qilalmaydu.

Hazir yaponiyide yashawatqan Uyghur siyasiy közetküchilerdin doktor turmuhemmet özining bu qétimqi weqedin qattiq qayghurghanliqini bildürdi.