Яш уйғур йетәкчилирини тәрбийиләш курси америка дөләт мәҗлиси бинасида башланди

Мухбиримиз гүлчеһрә
2015-05-06
Share
uyghur-yash-rehber-kurs-2015-1.png Яш уйғур йетәкчилирини тәрбийиләш курсидин бир көрүнүш
RFA/Erkin Tarim


Чәтәлләрдә паалийәт елип бериватқан дуня уйғур қурултийиниң йеңи бир нөвәтлик яш йетәкчилирини тәрбийиләш курсиниң ечилиш мурасими, 6 - май чүштин бурун 9 дин башлап пайтәхт вашингтонға җайлашқан, америка дөләт мәҗлиси бинасида откүзүлди.

Мурасимға, дуня уйғур қурултийиниң рәһбири рабийә қадир ханим вә муавин рәислири вә башқа паалийәтчиләр, америка вә дуняниң һәр қайси җайлиридин кәлгән курсант уйғур яшлардин башқа, бир қисим америка авам палата әзалири, америка дөләт мәҗлиси әзалири һәмдә бир қисим хәлқаралиқ кишилик һоқуқ тәшкилат вәкиллири һәмдә ахбарат васитилириниң мухбирлири болуп 100 әтрапида киши қатнашти.

Дуня уйғур қурултийи, америка уйғур бирләшмиси, хәлқара уйғур кишилик вә демократийә фондиниң һәмкарлиқи һәмдә америка демократийини илгири сүрүш фондиниң қоллиши билән уюштурулған, 10 - нөвәтлик дуня миқясидики яш уйғур йетәкчи - актиплириниң сиясий паалийәтлириниң кәсиплишишидә зөрүр болған демократийә, кишилик һоқуқ һәмдә хәлқара қанунлар қатарлиқ асасий билимләр бойичә тәрбийиләш программиси 6 - майдин 8 - майғичә 3 күн вашингтонда давам қилмақчи.

Ечилиш мурасими шәрқий түркистан миллий марши садасида пен университетиниң профессори, қилич қанат әпәндиниң риясәтчиликидә башланди. Алди билән рабийә қадир ханим һаяҗан ичидә : америка һөкүмитигә америка туприқида уйғур актиплиқиға, яшларға америкиниң сиясәт мәркизи болған дөләт мәҗлисидә җәм болуп өз хәлқи вә вәтининиң тәқдири мәсилилири үчүн йиғилидиған бир пурсәт яритилғанлиқиға, тәшәккур билдүрди һәм курсант яш актипларни тәбриклиди.

Рабийә ханим йәнә уйғур яш актиплириға мушундақ бир тәрбийиләш курсиниң ечилғанлиқиниң әһмийитигә юқири баһа берип: "болупму ши җинпиң һөкүмитиниң шәрқий түркистанда бастурушни күчәйткән мушундақ бир вәзийәттә дуня миқясида уйғур давасини илгирилитиш үчүн техиму көп яш актипларға еһтияҗлиқ биз, техиму көп пидакар әркинлик җәңчилириниң йетишип чиқидиғанлиқиға ишинимән иди" деди.

Мурасимда йәнә америка палата әзаси, америка дөләт мәҗлиси том ләнтос кишилик һоқуқ комитети муавин рәиси җим мак говерн, америка әркинлик өйиниң рәиси марк лагон, америка диний әркинлик комитети муавин рәиси катрина светт лантос, америка кишилик һоқуқ вә демократийини илгири сүрүш җәмийити муавин рәиси лоуиса гревә, хәлқара кәчүрүм тәшкилати асия ишлири мудири т. Кумар қатарлиқ уйғурларниң кишилик һоқуқ вә тәқдири мәсилилиригә йеқиндин көңүл бөлүп қоллап келиватқан хәлқаралиқ орган вә америка һөкүмитиниң муһим хадимлири тәклип билән тәбрик сөзи қилип дуня уйғур қурултийи һәмдә яш курсантларни тәбриклиди вә уларниң һәқлиқ күрүшини давамлиқ қоллайдиғанлиқини ипадилиди.

Улар йәнә баянлирида рабийә қадир ханимға алаһидә һөрмитини билдүрүп, рабийә қадир ханимни уйғурларниң дава йолидики йол башчи, өзини миллитиниң давасиға беғишлиғучи һармас күрәшчи дәп мәдһийилиди вә илһам бәрди.

Бу хәлқара миқясида уйғур давасини елип бериватқан яшларниң, рәһбәрлик вә хизмәт қабилийитини юқири көтүрүшни мәқсәт қилған мәзкур курсниң программа күн тәртипигә асасән, курсниң биринчи күни ечилиш мурасимидин кейин,курсантлар америка дөләт мәҗлисиниң һәр қайси комитетлирини зиярәт қилип комитетларниң қурулмиси вә америка һөкүмитиниң түзүлмиси хизмәт тәртиплири қатарлиқлат билән тонушуп чиқиду вә йәнә мәзкур органларда үнүмлүк иш беҗириш паалийәт елип бериш нәзирийиви билимлирини әмәлий практикиларда тәтбиқлап җанлиқ өгиниду.

Бу нөвәтлик курсниң илгирики қетимлардин артуқ йәнә бир тәрипи курсант яшлар 8 - май, курсниң ахирқи күни америка дөләт мәҗлисиниң бәзи әзалири билән шәрқий түркистан дәвасини илгири сүрүш, уйғур вәзийити вә мәсилилирини чөридәп шәхсий сөһбәт өткүзүш, соал сораш пурсәтлиригә игә қилиниду вә йәнә муһакимиләргә қатнишип уйғур давасиниң үнүмини юқири көтүрүш йоллири вә истратегийәлири үстидә өз пикирлирини оттурға қойиду. Демәк, бу яш актипларниң зөрүр болған асасий билим вә паалийәт қабилийитини өстүрүштә, көп хил шәкиллик риқабәтлик вә интайин қизиқарлиқ вә һаяҗанлиқ бир қетимлиқ тәҗрибә топлаш пурсити болидикән.

Биз д у қ ниң 10 - нөвәтлик яш уйғур актиплирини тәрбийиләш курсиниң 3 күнлүк паалийәтлиридин давамлиқ мәлумат беримиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт