Истанбулда уч нәпәр уйғур қизи йоқап кәтти

Түркийәдә яшаватқан уйғурлар саниниң ешишиға әгишип йүз бириватқан уйғур пәрзәнтләрниң йоқап китиш әһваллири йеқинқи мәзгилләрдә хели көпийип қалған болуп, пат - пат дегүдәк бу тоғрисидики еланларни һәр қайси иҗтимаи алақә вастилиридә көрүп түриватимиз.

Бу йоқап кәткән балиларниң бәзилири түрк қериндашлар тәрипидин тепивелинип ата - анилириға сақ - саламәт тапшуруп бирилгән болсиму, лекин йәнә бир қисим пәрзәнтләрни ата - анилар һазирғичә издәп йүрмәктә. Икки һәптә илгири зәйтинбурну варгилләр аптобус бекитидә 3 яшлиқ бир уйғур қизини йолда кетиватқан бир түрк тепивалған вә уйғурларға мәлум қилған. У қиз дадисиниң исмниң әркин икәнликини билдүргәндин кейин, әркин исимлик пүтүн уйғурларға телефон қилинған болсиму дадиси тепилмиған, әтиси уйғурлар сүрүштә қилиш арқилиқ қизниң ата - анисини тепип қизи билән учраштурған иди. Буларму зәйтинбурнуға йеңи кәлгән уйғур муһаҗирлардин бирси иди.

Уйғур дияридиму өсмүрләрниң йоқап кетиш нисбити әң көп йүз бериватқан бир паҗиә болуп, уйғур пәрзәнтлиригә суниватқан қара қол нурғун ата - аниларни зар - зар қахшатқан болса, түркийәгә кәлгән ата - аниларниң бипәрвалиқи вә бихудлиқи сәвәбидин бир қисим пәрзәнтләр, йеңи моһит билән тонушуп болғичә арилиқта, коча йолларда адишип қелип йоқап кәтмәктә.

Бу қизларниң йоқап кәткәнлики тоғрисидики хәвәр тизлик билән истанбулдики һәр қайси сақчи орунлириға йәткүзүлгән болсиму, әмма һазирғичә һечқандақ из - дерики болмиған. Сақчиларму әтраптики барлиқ сақчиханиларға бу хәвәрниң йәткүзүлгәнликини һәмдә җиддий түрдә издәш елип бериватқанлиқини билдүргән.

Бу һәқтә шәрқий түркистан маарип вә һәмкарлиқ җәмийитиниң рәиси һидайәтуллаһ оғузхан пикир - баян қилип истанбулға йеңи кәлгән уйғур муһаҗирларни пәрзәнтлиригә игә чиқиш, йолларда ташлап қоймаслиқ, диққәт билән қараш тоғрисида агаһландуруш бәрди. Йоқап кәткән қизларни тепиш үчүн сақчилар билән учрашқанлиқини билдүрди.

Сәфакөйдә йоқап кәткән бу үч қизниң аниси бу һәқтә тохтилип, қизлириниң чаршәнбә күни кәчтә өйгә қайтип кәлгәндә йоқап кәткәнликини билгән вә у қизларни бир кимниң елип қачқанлиқи вә яки өзлириниң чиқип кәткәнлики тоғрисида һечнемә ойлап йетәлмигәнликини ипадилиди. Бирақ у аял, қизлириниң анисиниң рохситисиз өйдин сиртқа чиқмайдиған қизлар икәнликини тәкитлиди.

Уйғур қизлириниң йоқап кәткәнлики тоғрисида истанбулниң сәфакөй районида яшайдиған адил абдуғупур әпәнди пикир баян қилип йоқап кәткән қизларни тепиш үчүн барлиқ уйғурларни ярдәмлишишикә чақириқ қилди.

Йоқап кәткән қизларниң дадиси сәйпуллаһ билән сақчиханиға биргә барған әнивәр қарақаш әпәнди бу һәқтә тохтилип, әһвални сақчиларға мәлум қилғанлиқини, сақчиларниң дәрһал һәрикәткә өтүп издәшкә башлиғанлиқини билдүрди.