Америка, хитай һөкүмитидин америка пуқралирини дәрһал қоюп беришини тәләп қилди

Америка һөкүмити шәнбә күни, хитай һөкүмитидин бейҗиң олимпик тәнһәрикәт йиғини җәрянида тибәт үчүн елип берилған намайишларда хитай сақчилири тәрипидин тутулған 8 америка пуқрасини дәрһал қоюп беришини тәләп қилди.
Мухбиримиз өмәр қанат хәвири
2008-08-23
Share

Франсийә агентлиқиниң бейҗиңдин хәвәр қилишичә, америкиниң бейҗиңдики баш әлчиханисиниң баянатчиси сузан стивән, шәнбә күни мухбирларға бәргән баянатида," биз мәзкур кишиләрниң дәрһал қоюп берилишини тәләп қилдуқ вә уларниң мәсилсини йеқиндин күзүтиватимиз" дегән.

Хәвәрдә ейтилишичә, хитай даирилириниң олимпик тәнһәрикәт йиғинидин хәлқара җамаәткә бейҗиң һөкүмитиниң сәвирчанлиқни вә мәтбуат әркинликигә һөрмәт қилидиғанлиқини көрситиш үчүн пайдиланмиғанлиқидин қаттиқ әпсусланғанлиқни тәкитлигән америка әлчиханисиниң баянатчиси," америка һөкүмити хитай һөкүмитини олимпик тәнһәрикәт йиғини җәрянида, кишиләрниң өз пикрини әркин азадә баян қилиш вә диний әркинлик қатарлиқ кишилик һоқуқ пиринсиплиригә һөрмәт қилишқа чақириду" дегән.

У ниң ейтишичә, америка әлчиханисиниң хадимлири тибәтни қоллиғучи паалийәтчиләр билән көрүшкән болуп, паалийәтчиләр қйин - қистаққа учримиғанлиқини билдүргән.

Хитай сақчи даирилири, сәйшәнбә күни бейҗиңда хитай һөкүмитиниң тибәткә қаратқан сияситигә қарши елип берилған намайиштин кейин, " җәмийәт интизамини бузғанлиқи" үчүн 6 чәтәл пуқрасиға 10 күнлүк түрмә җазаси берилгәнликини җакарлиған иди.

Пәйшәнбә күни болса, йәнә икки америка, бир әнгилийә вә бир герман пуқраси, бейҗиңда олимпик тәнһәрикәт паалийити өткүзүлүватқан мәйданға йеқин бир җайда тибәтни қоллап намайиш елип барғанлиқи үчүн хитай сақчилири тәрипидин тутуп кетилгән.

Җүмә күни әнгилийә ташқи ишлар министирлики, хитай һөкүмитиниң, манда макковән исимлик 41 яштики әнгилийә пуқраси бир аялниң 31 авғуст күни, йәни 10 күнлүк түрмә җазасини түгәткәндин кейин, хитайдин чиқириветилидиғанлиқини ухтурғанлиқини билдүрди.

Хәвәрләргә қариғанда, хитай даирилири олимпик җәрянида наразилиқ һәрикити елип барған чәтәлликләргә қаратқан сияситини өзгәрткән. Дәсләптә наразилиқ һәрикити елип барған чәтәлликләрни бир яки икки күндин кейин хитайдин чиқиривәткән бейҗиң даирилири әмди уларни 10 күн тутуп туруп андин чегридин қоғлап чиқармақта икән.
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт