Amérika, xitay hökümitidin amérika puqralirini derhal qoyup bérishini telep qildi

Fransiye agéntliqining béyjingdin xewer qilishiche, amérikining béyjingdiki bash elchixanisining bayanatchisi suzan stiwen, shenbe küni muxbirlargha bergen bayanatida," biz mezkur kishilerning derhal qoyup bérilishini telep qilduq we ularning mesilsini yéqindin küzütiwatimiz" dégen.

Xewerde éytilishiche, xitay da'irilirining olimpik tenheriket yighinidin xelq'ara jama'etke béyjing hökümitining sewirchanliqni we metbu'at erkinlikige hörmet qilidighanliqini körsitish üchün paydilanmighanliqidin qattiq epsuslan'ghanliqni tekitligen amérika elchixanisining bayanatchisi," amérika hökümiti xitay hökümitini olimpik tenheriket yighini jeryanida, kishilerning öz pikrini erkin azade bayan qilish we diniy erkinlik qatarliq kishilik hoquq pirinsiplirige hörmet qilishqa chaqiridu" dégen.

U ning éytishiche, amérika elchixanisining xadimliri tibetni qollighuchi pa'aliyetchiler bilen körüshken bolup, pa'aliyetchiler qyin - qistaqqa uchrimighanliqini bildürgen.

Xitay saqchi da'iriliri, seyshenbe küni béyjingda xitay hökümitining tibetke qaratqan siyasitige qarshi élip bérilghan namayishtin kéyin, " jem'iyet intizamini buzghanliqi" üchün 6 chet'el puqrasigha 10 künlük türme jazasi bérilgenlikini jakarlighan idi.

Peyshenbe küni bolsa, yene ikki amérika, bir en'giliye we bir gérman puqrasi, béyjingda olimpik tenheriket pa'aliyiti ötküzülüwatqan meydan'gha yéqin bir jayda tibetni qollap namayish élip barghanliqi üchün xitay saqchiliri teripidin tutup kétilgen.

Jüme küni en'giliye tashqi ishlar ministirliki, xitay hökümitining, manda makkowen isimlik 41 yashtiki en'giliye puqrasi bir ayalning 31 awghust küni, yeni 10 künlük türme jazasini tügetkendin kéyin, xitaydin chiqiriwétilidighanliqini uxturghanliqini bildürdi.

Xewerlerge qarighanda, xitay da'iriliri olimpik jeryanida naraziliq herikiti élip barghan chet'elliklerge qaratqan siyasitini özgertken. Deslepte naraziliq herikiti élip barghan chet'elliklerni bir yaki ikki kündin kéyin xitaydin chiqiriwetken béyjing da'iriliri emdi ularni 10 kün tutup turup andin chégridin qoghlap chiqarmaqta iken.