Amérika prézidént kandidatliri xitayni puqralirining kishilik hoquqlirini qoghdashqa chaqirdi
Muxbirimiz jüme xewiri
2008.09.15
2008.09.15
Démokratlar partiyisi prézidént kandidati barak obama we jumhuriyetchiler partiyisi kandidati jon mékéynlarning xitay siyasiti we amérika - xitay munasiwetliridiki meydani, 15 - séntebir düshenbe küni amérika soda birleshmisi xitay ishlar bölümining tor bétide élan qilindi.
Barak obama xitay siyasitide, kishilik hoquq jehette, xitayning özining barliq puqralirining kishilik hoquqini qoghdash, démokratiye we döletni qanun boyiche idare qilish yoligha qarap méngishining xitayni dölet ichi we sirtida hörmetke sazawer qilidighanliqi ilgiri sürgen we " emeliyette xitayning öz puqralirimu bularni kütidu we telep qilidu. Xitay démokratiye, qanun bilen idare qilish we kishilik hoquqni yolgha qoyush hemde ijra qilishqa qarap yüzlen'gen éqimdin ayrilip menggü mewjut bolup turalmaydu" dep otturigha qoyghan.
Jumhuriyetchiler partiyisi prézidént namzati jon mékéyn bolsa, bir döletning öz puqralirigha qandaq mu'amile qilishi xelq'ara diqqet - étibarini qozghaydighan qanuni téma ikenlikini, xitayning kishilik hoquq mesililiride nurghunlighan xelq'ara ehdinamilerge imza qoyghanliqini, bularning döletning bir pütünlüki mesilisidin üstün turidighanliqini ilgiri sürgen.
Ularning her ikkilisining siyasetliride yene, amérika - xitay soda munasiwetliri heqqide pilanlar otturigha qoyulghan bolup, barak obama béyjing da'irilirining ö z pulining qimmitini "sün'iy halda töwen" tutqanliqini bildürgen we xitayning öz pulining xelq'ara bazarda almashturush qimmitini tengshishige heydekchilik qilish jehette barliq diplomatiye wastilirini ishqa salidighanliqini otturigha qoyghan.
Kandidatlarning xitay siyasitide yene, dunya hawa kilimati özgirishi we énérgiye bixeterliki, yadro qorallirining kéngiyip kétishining aldin élish jehetlerde xitayni mes'uliyetchan we aktip bolushqa chaqiridighan tereplermu alahide közge chéliqidu.