Ақсарай хитайниң тибәттә намайиш қилған кишиләрни җазалиғанлиқиға әпсуслиниду

 Франсийә агентлиқиниң баян қилишичә, ақсарайниң баянатчиси бүгүн йәнә 'хитайда һәр қандақ адәм хәлқниң пикир баян қилиш вә топлиниш әркинлики һәққидә бәлгиләнгән қанунни бузмаслиқи керәк' дәп тәкитлиди вә хитай һөкүмитини өзиниң вәдисигә әмәл қилип далай ламаниң вәкиллири билән дәрһал сөһбәтлишишкә риғбәтләндүрди.

Түнүгүн 4 ‏ - айниң 29 ‏ - күни хитайниң шинхуа агентлиқи елан қилған бир хәвәрдә, өткән айда тибәттә қалаймиқанчилиқ чиқарған 30 кишиниң хитай һөкүмити тәрипидин түрмигә елинғанлиқини, әмди буларға очуқ сотта җаза һөкүм қилинғанлиқини баян қилған иди.

Асия кишилик һоқуқ көзитиш тәшкилатиниң башлиқи софи ричартсонму ' хитай һөкүмити гунаһкар билән гунаһсизни айришта адил болуши керәк, әйибләнгүчиләрни адвокатсиз қалдуруп мәхпий сотта сотлап җаза һөкүм қилмаслиқи керәк' дәп көрсәтти.

Хәвәрдә ейтилишичә, тибәтниң лхаса шәһиридә 3 ‏ - айниң 10 ‏ - күни дини затлар топлинип 1959 ‏ - йилидики тибәт қозғилиңини хатирилигән иди. Бу намайиш хитай һөкүмити тәрипидин бастурулғандин кейинму тибәт йәнила тинҗимиди.