Җорҗ бош косова рәһбәрлири билән көрүшти

Америка авази радиосиниң сәйшәнбә хәвәр елан қилишичә, дүшәнбә күни, америка президенти җорҗ бош, ақ сарайда косованиң рәһбәрлирини күтүвалған.
Мухбиримиз гүлчеһрә хәвири
2008.07.22

 Бу учришиш, косованиң бу йил иккинчи айда сербийиниң ишғалийитидики бир өлкә болуш тарихини ахирлаштуруп мустәқиллиқ елан қилғандин кейинки,икки дөләт рәһбәрлириниң тунҗи учришиши һесаблиниду.

Косова президенти фатмер сәйиди вә баш министири һашим таҗи билән көрүшкән җорҗ бош, өзиниң косова мустәқиллиқини қизғин қоллайдиғанлиқини ипадилигәндин сирт йәнә," мән һазирға қәдәр косова мустәқиллиқини етирап қилмиған башқа дөләтләрниңму тез арида косова мустәқиллиқини қоллишини қолға кәлтүрүшкә давамлиқ тиришчанлиқ көрситимән, косовани парчилаш мәқситидики һәр қандақ һәрикәткә қарши туримән" дегән.

Косова яврупа иттипақиға вә йәнә шималий атлантик әһди тәшкилатиға әза болушни илтимас қилған болуп, америка президенти җорҗ бош косованиң бу арзусини қоллайдиғанлиқини билдүргән.

 17 - Феврал күни косова мустәқиллиқ елан қилип, өзиниң әркин, демократик вә игилик һоқуқлуқ дөләт икәнликини җакарлиди. Косова мустәқиллиқ елан қилғандин етибарән, америка қошма штатлири вә яврупа иттипақиға әза мутләқ көп қисим дөләтләр шуниңдәк түркийә, афғанистан қатарлиқ бир қисим мусулман мәмликәтлири болуп 40 тин артуқ дөләтләрниң етирап қилишиға еришти.

Косова җумһурийити балқан йерим арилидики сербийиниң шәрқий җәнубиға тоғра келиду. Икки милйондин артуқ аһалиси болуп, %90 ни мусулман албанлар игилигәндин башқа йәнә, нопуси %10 гә йәтмәйдиған серблар, кродийиликләр, түркләр һәм қара тағлиқлар яшайду.

Бош бу учришишта йәнә, косова рәһбәрлириниң вәдисидә туруп косовада һәр милләтләргә баравәр сиясәт йүргүзгәндила хәлқара җәмийәтниң омумйүзлүк етирап қилишиға еришәләйдиғанлиқини тәкитлигән. Сөһбәттин кейин косова баш министири һашим таҗи мухбирларға косова һөкүмити косова чегриси ичидә яшаватқан серб қатарлиқ аз санлиқ милләтләргә баравәр һоқуқ беришкә капаләтлик қилидиғанлиқини билдүргән.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.