Jorj bosh kosowa rehberliri bilen körüshti

 Bu uchrishish, kosowaning bu yil ikkinchi ayda sérbiyining ishghaliyitidiki bir ölke bolush tarixini axirlashturup musteqilliq élan qilghandin kéyinki,ikki dölet rehberlirining tunji uchrishishi hésablinidu.

Kosowa prézidénti fatmér seyidi we bash ministiri hashim taji bilen körüshken jorj bosh, özining kosowa musteqilliqini qizghin qollaydighanliqini ipadiligendin sirt yene," men hazirgha qeder kosowa musteqilliqini étirap qilmighan bashqa döletlerningmu téz arida kosowa musteqilliqini qollishini qolgha keltürüshke dawamliq tirishchanliq körsitimen, kosowani parchilash meqsitidiki her qandaq heriketke qarshi turimen" dégen.

Kosowa yawrupa ittipaqigha we yene shimaliy atlantik ehdi teshkilatigha eza bolushni iltimas qilghan bolup, amérika prézidénti jorj bosh kosowaning bu arzusini qollaydighanliqini bildürgen.

 17 - Féwral küni kosowa musteqilliq élan qilip, özining erkin, démokratik we igilik hoquqluq dölet ikenlikini jakarlidi. Kosowa musteqilliq élan qilghandin étibaren, amérika qoshma shtatliri we yawrupa ittipaqigha eza mutleq köp qisim döletler shuningdek türkiye, afghanistan qatarliq bir qisim musulman memliketliri bolup 40 tin artuq döletlerning étirap qilishigha érishti.

Kosowa jumhuriyiti balqan yérim arilidiki sérbiyining sherqiy jenubigha toghra kélidu. Ikki milyondin artuq ahalisi bolup, %90 ni musulman albanlar igiligendin bashqa yene, nopusi %10 ge yetmeydighan sérblar, krodiyilikler, türkler hem qara taghliqlar yashaydu.

Bosh bu uchrishishta yene, kosowa rehberlirining wediside turup kosowada her milletlerge barawer siyaset yürgüzgendila xelq'ara jem'iyetning omumyüzlük étirap qilishigha érisheleydighanliqini tekitligen. Söhbettin kéyin kosowa bash ministiri hashim taji muxbirlargha kosowa hökümiti kosowa chégrisi ichide yashawatqan sérb qatarliq az sanliq milletlerge barawer hoquq bérishke kapaletlik qilidighanliqini bildürgen.