Канада ташқи ишлар министири Peter Mackay хитай зиярити җәрянида һөсәйин җелил мәсилисини оттуриға қойди


2007-04-30
Share

Канада ташқи ишлар министири Peter Mackay хитай зиярити җәрянида һөсәйин җелил мәсилисини оттуриға қойған болуп, униң қәйт қилишичә, һөсәйин җелил хитай түрмисидә қийин-қистаққа вә тән җазасиға учримиған икән.

30 - Април бейҗиңда мухбирларни күтивелиш йиғинида канада ташқи ишлар министири Peter Mackay мунуларни билдүрди "әлвәттә җелил әпәндиниң мәсилисини оттуриға қойдум, болупму һазирға қәдәр мәзкур канада пуқраси билән көрүшүш тәлипимизниң рәт қилинишидин чоңқур үмидсизләнгәнликимизни ипадилидим".

Peter MackayНиң билдүрүшичә йәнә, һөсәйин җелил мәсилиси у йеңидин тәйинләнгән хитай ташқи ишлар министири яң җйечи билән өткүзгән 4 саәтлик диалогиниң баш темиси болған.

Peter Mackay Һөсәйин җелилниң түрмә һаяти үстидә, хитай ташқи ишлар министири яң җйечиниң сөзлиридин нәқил кәлтүрүп: һөсәйин җелилниң түрмидә қийин ‏- қистаққа елинмиғанлиқини һәмдә униңға хәлқара кишилик һоқуқ өлчәмлиригә һөрмәт қилинған асаста муамилә қилинғанлиқини әскәртти. Хитай һөкүмити һөсәйин җелилниң канада пуқралиқини етирап қилмай "һөсәйин җелил мәсилиси хитайниң ички иши" дәп чиң туруп, канада тәрәпниң һөсәйин җелил билән көрүшүш тәлипини изчил түрдә рәт қилип кәлгән болғачқа бу мәсилә канада-хитай арисидики талаш-тартишниң мәркизи болуп кәлгән.

Peter Mackay Йәнә мунуларни билдүрди: "һөсәйин җелил билән көрүшүшкә йол ечиш һөкүмитимиз үчүн интайин муһим мәсилә. Биз буниң үчүн давамлиқ издинимиз".

Һөсәйин җелил 2005-йили канада пуқралиқиға қобул қилинған болуп, 2006-йили өзбекистанға туғқан йоқлашқа барғанда тутқун қилинип хитайға өткүзүп берилгән. Йеқинда хитай һөкүмити һөсәйин җелилни "террорлуққа қатнишиш вә дөләтни парчилашқа урунуш" дегән җинайәтләр билән әйибләп муддәтсиз қамақ җазаси бәргән иди. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт