Jumhuriyetchiler namzati jon mikéyn özining mu'awin prézidént namzatliqigha bir ayalni tallidi

 Bu yil 44 yashlardiki péylin xanimning yéshi barak obamadin kichik bolup, u alyaska shitatining waliliqigha saylan'ghan 2 yildin béri bir qatar islahatlarni élip bérish bilen tonulghan bolsimu, lékin amérikiliqlargha anche tonush bolmighan siyasetchidur. Jon mikéyn jüme küni oxayu shtatining deyton shehiride élip barghan saylam pa'aliyiti we tughulghanliqining 72 - yilliqini xatirilesh pa'aliyitide sara péylin xanimni mu'awin prézidént namzatliqigha tallighanliqini jakarlidi.

Besh balining anisi bolghan péylin xanim hamildar ayallarning bala chüshürüshige qet'iy qarshi turidighan jumhuriyetchi zatlarning biri. Analizchilar, jon mikéynning bir ayalni özige yardemchi qilip tallighanliqi démokratik namzatlarning saylam riqabitide xillariy klintonning barak obama teripidin meghlup qilin'ghanliqigha narazi bolghan ayal démokratlarning qollishigha érishishtiki bir taktika, dep qarimaqta.

Shundaqla uning yash ikenliki, islahatchiliqi mikéynning ornini kücheytip, yash saylighuchilarni jelp qilidighanliqi, obamaning amérikini özgertish chaqiriqigha riqabet élip kélidighanliqi perez qilinmaqta. Eger sara péylinning namzatliqi kéler düshenbe küni bashlinidighan jumhuriyetchiler partiyisining döletlik qurultiyida resmileshse, bu amérika tarixida tunji qétim bir ayalning mu'awin prézidéntliq riqabitige chüshüshi bolup qalidu. Lékin sara péylinni reqibi démokiratlar mu'awin prézidént namzati j'o baydén'gha sélishturghanda tashqi ishlar we washin'gtondiki hakimiyet ishlirida tejribilik dégili bolmaydu. Bu sara péylinning j'o baydén'gha nisbeten körünerlik ajizliqi bolushi mumkin.