Хәлқара олимпик комитети хитай гимнастика маһирлириниң йешини тәкшүрүшни тәләп қилди

 Олимпик комитети хәлқара мәтбуатларниң бу һәқтики хәвәрлириниң бесими астида ахири хитай гимнастика маһирлириниң йешини тәкшүрүшни қарар қилған. Хәлқара олимпик комитетиниң баянатчиси гиселле дәйвис мундақ дәйду": биз гимнастика бирләшмисидин тәкшүрүш елип беришни тәләп қилдуқ....Әгәр бу йәрдә бирәр гуман болса яки бизни биарам қилидиған бирәр иш болса биз һәр қайси тәнтәрбийә түрлириниң мәсул органлиридин тәкшүрүш елип беришни тәләп қилимиз."

Геселле дәйвис ханим йәнә, хитай мәмликәтлик гимнастика бирләшмисиниңму тәкшүрүш елип беришини тәләп қилған. Хәлқара мәтбуатлар бу нөвәтлик олимпик йиғинида 2 алтун медалға еришкән хитай гимнастика маһири хе кешин, җяң юйүән вә яң йилинниң әмдила 14 яшқа киргәнлики, лекин олимпик комитетиниң бәлгилимисидә гимнастикичиларниң 16 яштин төвән болмаслиқи керәкликини илгири сүргән иди. Лекин хитай гимнастика өмикиниң тренири лу шәнҗен бирләшмә агентлиқи мухбириға кишиләрни бу җәһәттики гумандин халас қилиш үчүн хе кешинниң паспорт, нопус вә кимлик кинишкисини олимпик комитетиға тапшурғанлиқини билдүргән.

Олимпик комитети вә хәлқара гимнастика бирләшмиси илгири хитай гимнастикичилириниң паспортидики йеши бәлгилимигә уйғун келидиғанлиқини елан қилған иди. Лекин бирләшмә агентлиқи бу айниң башлирида хитай дөләтлик тәнтәрбийә идарисиниң тор бетидин хе кешинниң 1994 ‏ - йили 1 ‏ - январда, яң йилинниң 1993 ‏ - йили 26 ‏ - авғуст күни туғулғанлиқини, әмма олимпик мусабиқисигә тизимға алдурғанда туғулған күниниң 1992 ‏ - йилиға өзгирип қалғанлиқини байқиған.