Хитай, радиомизниң тибәт бөлүм мухбирини чегридин киргүзмиди

Радиомизниң тибәт бөлүм мухбири Dhondup Gonsar түнүгүн, бейҗиң олимпики җәрянида ахбаратчилиқ қилиш үчүн йолға чиққан иди. У чеграға кәлгәндә хитай кириш рухсити бәрмигән.
Мухбиримиз шөһрәт һошур хәвири
2008.08.07

 Мухбир Dhondup Gonsar тибәтлик америка вәтәндишидур. Әслидә униң бейҗиң олимпикиға қатнишип мухбирлиқ қилиш салаһийити хәлқара олимпик комитети тәрипидин тәстиқлинип болған вә барлиқ чегридин кириш рәсмийәтлири толуқ иди. Радиомиз бу мунасивәт билән бүгүн баянат елан қилип, хитайни әйиблиди.

Радиомиз баянатида, хитай һөкүмитини мухбир Dhondup Gonsar ниң дәрһал йолини ечишқа чақирди вә хәлқара олимпик комитетиниң мәсули Jacques Rogge әпәндидин, бейҗиң олимпикини дуняға очуқ болуш принсипиға әмәл қилдурушни тәләп қилди.

Хитай бейҗиң олимпикиға биринчи дәриҗилик тәһдит уйғурлар, иккинчи дәриҗилик тәһдит тибәтликләр дәп қаримақта. Түнүгүн хитай кишилик һоқуқ паалийәтчиси яң җйәнлиму чегрида тосувелинған иди.

Қолида хитай паспорти болған яң җйәнли бүгүн японийигә йолға селиветилгән. Өз вәтәндишини чегридин киргүзмәслик олимпик саһипханлиқи тарихидики тунҗи вәқә һесаблиниду.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.