Rusiyide putin heqqide yalghan uchur tarqatqan gézit toxtitildi

Yéqinda rusiyining moskwa shehiride chiqidighan gézitlerning biri" moskwa muxbirliri" rusiye prézidénti wladimir putinning ayali ludmila bilen ikki ay ilgiri ajriship ketkenliki hemde putinning sankitpétérburg shehiride ataqliq muz téyilish gimnastika mahiri, olimpik chémpiyoni, rusiye dumasining ezasi alina kabayéwa bilen toy murasimi ötküzüdighanliqi heqqide xewer tarqatqan idi.
Muxbirimiz ümidwar xewiri
2008.04.20

 Bu xewer tézdinla pütün rusiyini zil - zilge saldi shundaqla xelq'araliq qiziqish qozghidi. Bu munasiwet bilen güzel tenterbiye cholpini alina kabayéwa bu xewerni inkar qilipla qalmastin belki mezkur gézitni sotqa tartidighanliqini jakarlidi. Prézidént putinmu buni inkar qildi.

Rusiyining "dini.Ru" torining xewer qilishiche, putin 19 april küni italiyini ziyaret qilghanda, muxbirlarning bu heqtiki so'aligha duch kelgende, mezkur xewerni inkar qilghan hemde rusiye ayallirining eng güzel ayallar ikenlikini maxtash bilen özi heqqide tarqalghan uchurning yalghanliqini eyibligen.

 Bu weqe munasiwiti bilen "moskwa muxbirliri géziti" ishtin toxtitilghan bolsimu, biraq putinning shexsiy turmushigha a'it uchurlar beribir köpiyishke bashlighan, kishiler putinning ikki aydin buyan ayali bilen bir sorunda körünmigenliki hetta yéqinda amérika prézidénti bush sochigha kelgendimu putinning ayalining meydanda bolmighanliqidin her xil qiyaslarni otturigha chiqirishqan.

Qiziq yéri shuki, putin toy qilidu déyilgen 24 yashliq güzel cholpanning dadisimu, " eger qizim putin'gha tegse nahayiti yaxshi ish boptu" dégen iken.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.