Хәлқара кәчүрүм тәшкилати хитайниң олимпик вәдисидә турмиғанлиқи һәққидә доклат елан қилди

Бирләшмә агентлиқиниң хәвиригә асасланғанда , хәлқара кәчүрүм тәшкилати 29 - июл күни " хитай хәлқ җумһурийити: олимпик тәтүр санаш - вапа қилинмиған вәдиләр" намлиқ доклатни елан қилған.
Мухбиримиз гүлчеһрә хәвири
2008-07-29
Share

 Олимпик һарписида елан қилинған бу доклатта хитайниң 2001 - йили хәлқара олимпик комитетиға кишилик һоқуқ хатирисини яхшилаш тоғрисида бәргән вәдилирини әмәлгә ашурушта һечқандақ илгириләш болмиғанлиқи, адәм тутушниң давамлишиватқанлиқи тәнқид қилинған.

Доклатта, хитайда өлүм җазалири, қалаймиқан тутқун қилиш,кишилик һоқуқ һимайичилириниң зорлуқ - зомбулуққа учришиши, интернет алақисигә қаритилған чәкләш қатарлиқ төт нуқта буйичә хитайниң олимпик һарписидики кишилик һоқуқ әһвали тәпсилий қарап чиқилған асаста "әмәлийәттә хитайда кишилик һоқуқ паалийәтчилири, мухбирлар, вә адвокатлар пәқәт бейҗиңниң олимпик саһипханлиқи үчүнла техиму еғир дәриҗидә бастурулди" дәп көрситилгән.

Доклатниң бу йил киргәндин буянқи хитайда йүз бериватқан кишилик һоқуқ дәпсәндичиликлиригә аит қисмида бейҗиң олимпик мәшили уйғур аптоном районидин өткәндә хитай һөкүмәт даирилириниң, қораллиқ сақчи қисимлирини ишқа селип йәрлик аммини биарам қилидиған бир җиддий вәзийәттә қойғанлиқи һәтта қәшқәрдә чәтәл мухбирлириға йәрлик аммини зиярәт қилмаслиқи һәққидә агаһландуруш берилгәнлики көрситилгән.

Хәлқара кәчүрүм тәшкилати мәзкур доклати арқилиқ хәлқара олимпик комитети вә дуня сиясий рәһбәрлирини кишилик һоқуқ мәсилисидә хитайға бесим ишлитишкә чақирған.

Бүгүн хитай ташқи ишлар министирлиқи баянатчиси лю җийәнчав хәлқара кәчүрүм тәшкилатиниң хитайниң олимпик һарписидики кишилик һоқуқ әһвали һәққидики доклатини рәт қилип бәргән баянатида : "хитайни чүшинидиған һәр қандақ бир адәм, хәлқара кәчүрүм тәшкилатиниң бу доклатта хитайға қаратқан тәнқидлиригә қошулмайду" деди.

Һалбуки, хәлқара кәчүрүм тәшкилати асия тинч окян бөлүминиң директори т. Кумар әпәнди өз тәшкилати елан қилған мәзкур доклатниң, хитай һөкүмити 2001 - йили олимпик саһипханлиқини талишиватқанда бәргән вәдилири вә шу вәдилириниң әмәлгә ешиш дәриҗисиниң нөвәттики әһвали һәққидики пакитлар асасида тәйярланғанлиқини билдүрди.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт