Бирләшкән дөләтләр тәшкилати хитайниң ғәрбидики намрат районларниң муһитини яхшилаш үчүн қәдәм ташлиди


2007.02.08

Бирләшкән дөләтләр тәшкилати йеқинда, хитайниң ғәрбидики намрат районларниң муһитини яхшилаш үчүн, дәсләпки қәдәмдә 1 милйон 700 миң америка доллири аҗритидиғанлиқини билдүрди.

Бирләшкән дөләтләр тәшкилатиниң тәрәққият пилан кометитиниң муһитни яхшилаш үчүн елип баридиған хизмитиниң мәқсиди, бундин кейинки үч йил ичидә хитайниң ғәрбидики 12 өлкидә, мәхсус иш беҗириш понкитлири қуруп, пүтүн йәр шари килиматида йүз бериватқан өзгиришниң алдини елишни күчәйтиштин ибарәт икән.

Нөвәттә, хәлқарадики мүтәхәссисләр, хитайниң муһит мәсилисигә көңүл бөлмәйватқанлиқини қаттиқ тәнқид қилип, хитайниң иқтисадни тәрәққи қилдуруш билән биргә муһит мәсилисгиму алаһидә әһмийәт беришини тәләп қилмақта. Мүтәхәссисләрниң билдүрүшичә, хитайда һәр һәптидә, көмүр йеқилғуси билән һәрикәтләндүрүлидиған електир истансисидин бири қурулидикән. Бу хитайда муһитни еғир дәриҗидә булғайдиған асаслиқ амилардин бири һесаблиниду.

Уйғур ели, хитайдики муһити еғир дәриҗидә булғанған асаслиқ районларниң бири болуп, уйғурлар бирләшкән дөләтләр тәшкилатиниң муһит мәсилисини яхшилаш үчүн елип бериватқан мәзкүр қәдиминиң уйғур елидики муһит булғиниши мәсилисиниң яхшилинишиға ярдәм көрситишидин үмид күтмәктә.

Хитайниң уйғур елидә ашкарә вә йошурун елип барған атом синақлири вә ечиш характиридики пилансиз кан , қудуқ қезишлири мәзкүр район муһитиға тәсир көрситипла қалмай, бу земинда яшаватқан хәлқниң түрлүк сақаймас кесәлләргә гириптар болушини мәйданға кәлтүрмәктә . (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.