Chégrisiz muxbirlar teshkilati xitayni oxshimighan pikirdiki zatlargha ziyankeshlik qilish bilen eyiblidi

 Chégrisiz muxbirlar teshkilatining jüme küni élan qilghan axbaratida eskertishiche, mezkur teshkilat bu yil kirgendin béri xitay da'irilirining metbu'at muxbiri, tor yazghuchisi we erkin pikir qilghuchi zatlardin bolup 24 kishini qolgha alghan hem jazagha tartqanliqini xatirilep chiqqan. Chégrisiz muxbirlar teshkilati bu mezgilde yene az dégende 80 neper chet'ellik muxbirning xizmet jeryanida awarigerchilikke uchrighanliqini, bu awarigerchilikler tibet, Uyghur ili we sichüendiki tibetler olturaqlashqan rayonlarda yüz bergenlikini bildürdi.

Axbaratta chégrisiz muxbirlar teshkilati mundaq dep xitab qilidu, " béyjing olimpik teshkili komitéti we xelq'ara olimpik komitéti köp qétim metbu'at erkinlikini échiwétish toghrisida wede bergen, ularning bu wedisi qéni? "

Mezkur organ axbaratida yene "béyjing olimpik yighini xitayning metbu'atni échiwétishige türtke bolmayla qalmay, eksiche qolgha élish, awarigerchilik peyda qilish, axbaratni teqip qilishigha bahane bolup berdi " dep tekitligen. Chégrisiz muxbirlar teshkilatining xadimi lusiye morilén peyshenbe küni washin'gtondiki xitay elchixanisi aldida ötküzülgen yighilishta Uyghur rehbiri rabiye qadir xanimning oghli ablikim abduréhimning tor bétide maqale yazghanliqidin qolgha élin'ghanliqi we "döletning obrazini xunukleshturush" bilen sotlan'ghanliqini eyibligen idi.