Xitay bixeterlik da'iriliri " kunmingda yüz bergen aptobus partlash weqesi olimpikqa qaritilmighan" dédi

 Künming aptobus partlitish weqesi heqqide bügün axbarat da'irilirige bayanat bergen xitay tashqi ishlar ministirliqi bayanatchisi " partlash weqesining biwaste béyjing olimpikqa baghlinishliqi barliqi éniqlanmighan bolsimu, emma yenila weqening xaraktéri we sewebini tekshürüshni dawamlashturimiz"dégen.

Kunmingda düshenbe küni bir sa'et ichide yüz bergen üch qétimliq aptobus partlashta 3 kishi ölgen, 14 kishi yaridar bolghan idi. Nöwette saqchilar kunmingning asasliq qatnash tügünlirini nazaret astigha alghan.

Bu qétimqi aptobus partlash weqesi bir ay ichide, xitayning jenubiy ölkiliride yüz bergen 3 ‏ - chong weqe hésablinidu. Béyjing olimpikigha bir aymu qalmighan peytte yüz bergen mezkur weqege xitay hemde xelq'ara metbu'atlarda keng orun bérilgen.

Xitay hökümiti Uyghur élide yüz bergen her qandaq bir weqeni térrorluq herikiti dep eyiblep kelgen, xitayning bu qétimqi yünnendiki partilashning xaraktérini qandaq békitidighanliqi axbarat da'irilirini qiziqturuwatqan muhim nuqta bolup, fransiye agéntliqining xewiride"xitay hökümiti buning aldida, béyjingdin nahayiti yiraq bolghan shinjangda we tibette olimpikqa buzghunchiliq qilish heriketlirining aldini élish üchün bixeterlik tedbirlirini alahide kücheytken" dep tekitligen.