Бейҗиң һөкүмити йеқинда елип баридиған олимпик паалийитини елан қилди

'Шинхуа агентлиқи' бүгүн 4 ‏ - айниң 23 ‏ - күни, бейҗиң һөкүмитиниң олимпик мусабиқиси башлинишқа 100 күн қалған күндин башлап елип берилидиған тәбрикләш вә тәшвиқат паалийитиниң мәзмунлирини елан қилди.
Мухбиримиз вәли хәвири
2008-04-23
Share

 Бейҗиң олимпик комитети алақилишиш бөлүминиң башлиқи ваң хуйниң ейтишичә, хитай һөкүмитиниң бу паалийити 4 ‏ - айниң 30 ‏ - күни башлинидикән.

Хәвәрдә ейтилишичә, мушу күндә бейҗиңдики тәнтәрбийә сарайлирида чоң көләмлик нахша фестивали, чавяң бағчисида 6000 кишилик тез меңиш мусабиқиси вә бейҗиңниң ават кочилирида 10 миң кишилик, 13 километрлиқ марафон мусабиқиси өткүзилидикән.

Канадада турушлуқ мустәқил язғучи шең шө ханимниң баян қилишичә, хитай һөкүмити биринчи май күни пүтүн мәмликәт буйичә 'вәтәнпәрвәрлик намайиши' өткүзүшни орунлаштурған. 'Биринчи май қурулуши' дәп аталған бу пиланниң мәзмуниға қариғанда, хитай һөкүмити шу күни бейҗиңдики тйәнәнмен мәйдани, тибәттики будалагоң ибадәтханиси, үрүмчидики хәлқ мәйдани, кокхоттики шинхуа мәйдани, шаңхәйниң вәйтән бағчиси қатарлиқ 20 нәччә чоң шәһәрдики мәшһур җайларда намайиш қилишни, намайишчиларниң дунядики сәккиз чоң санаәт дөлитиниң әлчиханилири алдида тәшвиқ вариқи тарқитишни бәлгилигән.

Хитай һөкүмити йәнә, намайишта товлинидиған 20 нәччә түрлүк шуарни йезип тарқатқан. Бу шуарларниң ичидә ' шәрқтики шир ойғанди' , 'бейҗиң олимпик мусабиқиси җуңгониң дуняда бир қудрәтлик дөләткә айланғанлиқиниң башлиниши', 'җуңго шәрқтики кесәл көрписи дегән намдин видалашқанлиқиниң башлиниши', олимпик мусабиқиси үчүн сәккиз йил тәйярлиқ қилдуқ, бу җәрянда сансиз һақарәтни ичимизгә ютивәттуқ', әвладларниң яхши күн көрүши үчүн ғәрб әллириниң земинимизда микданл, карифор, кинтаки дегән ашханилирини ечишиға рухсәт қилдуқ, маллиримизни әң әрзан баһада сетиш үчүн нюйорк, париж, лондонларға йоллап бәрдуқ', 'сәккиз чоң санаәт дөлитигә хошамәт қилиш үчүн бойин, гием, тойота ширкәтлиридин мал дугвар қилдуқ', 'сәккиз чоң санаәт дөлити җуңгодин қорқуду, шуңлашқа бизни мәңгү кесәл көрписи қилмақчи болди вә бизни йәткүчә һақарәтливалди', ' биз олимпик өткүзүп, җуңхуаға қарши күчләрни йоқ қилип, баш көтүрүш үчүн 100 йил сақлидуқ', олимпик үчүн хәлқниң өйлирини мәҗбурий чеқип, уларни тибәт, шинҗаңдәк җайларға палидуқ', 'сәккиз чоң дөләт тибәт мустәқилчилири қатарлиқ җуңхуаға қарши күчләрни күшкүртүп бизгә бузғунчилиқ қилмақчи болди, әмди биз җенимиз вә қенимиз билән җуңгониң пүтүнлүкини қоғдаймиз'... Қатарлиқ хитай милләтчиликини қутритидиған шуарлар бар.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт