Béyjing hökümiti yéqinda élip baridighan olimpik pa'aliyitini élan qildi

'Shinxu'a agéntliqi' bügün 4 ‏ - ayning 23 ‏ - küni, béyjing hökümitining olimpik musabiqisi bashlinishqa 100 kün qalghan kündin bashlap élip bérilidighan tebriklesh we teshwiqat pa'aliyitining mezmunlirini élan qildi.
Muxbirimiz weli xewiri
2008-04-23
Share

 Béyjing olimpik komitéti alaqilishish bölümining bashliqi wang xuyning éytishiche, xitay hökümitining bu pa'aliyiti 4 ‏ - ayning 30 ‏ - küni bashlinidiken.

Xewerde éytilishiche, mushu künde béyjingdiki tenterbiye saraylirida chong kölemlik naxsha féstiwali, chawyang baghchisida 6000 kishilik téz méngish musabiqisi we béyjingning awat kochilirida 10 ming kishilik, 13 kilométrliq marafon musabiqisi ötküzilidiken.

Kanadada turushluq musteqil yazghuchi shéng shö xanimning bayan qilishiche, xitay hökümiti birinchi may küni pütün memliket buyiche 'wetenperwerlik namayishi' ötküzüshni orunlashturghan. 'Birinchi may qurulushi' dep atalghan bu pilanning mezmunigha qarighanda, xitay hökümiti shu küni béyjingdiki tyen'enmén meydani, tibettiki budalagong ibadetxanisi, ürümchidiki xelq meydani, kokxottiki shinxu'a meydani, shangxeyning weyten baghchisi qatarliq 20 nechche chong sheherdiki meshhur jaylarda namayish qilishni, namayishchilarning dunyadiki sekkiz chong sana'et dölitining elchixaniliri aldida teshwiq wariqi tarqitishni belgiligen.

Xitay hökümiti yene, namayishta towlinidighan 20 nechche türlük shu'arni yézip tarqatqan. Bu shu'arlarning ichide ' sherqtiki shir oyghandi' , 'béyjing olimpik musabiqisi junggoning dunyada bir qudretlik döletke aylan'ghanliqining bashlinishi', 'junggo sherqtiki késel körpisi dégen namdin widalashqanliqining bashlinishi', olimpik musabiqisi üchün sekkiz yil teyyarliq qilduq, bu jeryanda sansiz haqaretni ichimizge yutiwettuq', ewladlarning yaxshi kün körüshi üchün gherb ellirining zéminimizda mikdanl, karifor, kintaki dégen ashxanilirini échishigha ruxset qilduq, mallirimizni eng erzan bahada sétish üchün nyuyork, parizh, londonlargha yollap berduq', 'sekkiz chong sana'et dölitige xoshamet qilish üchün boyin, gi'ém, toyota shirketliridin mal dugwar qilduq', 'sekkiz chong sana'et döliti junggodin qorqudu, shunglashqa bizni menggü késel körpisi qilmaqchi boldi we bizni yetküche haqaretliwaldi', ' biz olimpik ötküzüp, jungxu'agha qarshi küchlerni yoq qilip, bash kötürüsh üchün 100 yil saqliduq', olimpik üchün xelqning öylirini mejburiy chéqip, ularni tibet, shinjangdek jaylargha paliduq', 'sekkiz chong dölet tibet musteqilchiliri qatarliq jungxu'agha qarshi küchlerni küshkürtüp bizge buzghunchiliq qilmaqchi boldi, emdi biz jénimiz we qénimiz bilen junggoning pütünlükini qoghdaymiz'... Qatarliq xitay milletchilikini qutritidighan shu'arlar bar.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet