Sarkoziy béyjing olimpik yighinigha qatnishidiken

" Fransiye lémondé" gézitining jüme küni xewer qilishiche, xitayning tibettiki basturush herikiti tüpeyli béyjing olimpik yighinini bayqut qilidighanliqini agahlandurghan fransiye prézidénti sarkoziy, olimpik yighinining 8 ‏ - awghusttiki échilish murasimigha qatnashmaqchi bolghan.
Muxbirimiz erkin xewiri
2008-07-04
Share

 Xewerlerge qarighanda, sarkoziy kéler hepte yaponiyide chiqirilidighan G - 8 ler yighinida xitay dölet re'isi xu jintawgha özining olimpik murasimigha qatnishidighanliqini bildüridiken.
Fransiye prézidént sariyidin alghan uchurlargha asasen bérilgen xewerde, " nikolas sarkoziy olimpik yighinining 8 ‏ - awghusttiki échilish murasimigha qatnishish üchün béyjinggha barmaqchi," dep tekitligen.

Sarkoziy ilgiri xitayning tibet mesilisidiki pozitsiyisige qarap, olimpik yighinigha qatnishish yaki qatnashmasliqini qarar qilidighanliqini bildürgen idi. Sarkoziyning prézidént sariyi jüme küni bu heqtiki xewerlerge baha bérishni ret qilghan, lékin fransiye prézidéntining kéler hepte G - 8 ler yighinida öz qararini élan qilidighanliqini tekitligen.

Sarkoziy düshenbe küni fransiyining bir téléwiziye qanilidiki söhbitide, özining qandaq qarargha kélishi xitay bilen dalay lama arisidiki söhbetning ilgirilishige baghliq ikenlikini ilgiri sürgen idi. Fransiye xitayning tibettiki basturush herikitini eng shiddetlik tenqid qilghan gherb döletlirining biri bolup, olimpik mesh'ili parizhda yetküzülgende zor kölemlik qarshiliqqa duch kelgen.

Sarkoziyning tibet mesilisidiki meydani xitay puqralirida öchmenlik tuyghusini kücheytip, xitaydiki fransiye dukini "keryfor" ning mallirini bayqut qilish chaqiriqi ewj alghan idi. Yéqinda élip bérilghan torda ray sinash netijisidin qarighanda %90 xitay sarkoziyning olimpik yighinigha qatnishishigha qarshi iken.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet