Уйғур елидә сетиливатқан 5 хил унда рак пәйда қилидиған мадда байқалған

Йеқинда пүтүн уйғур ели бойичә һәр хил йимәкликләр үстидин елип берилған бир тәкшүрүштә, уйғур елидики базарларда сетиливатқан 5 хил унда рак пәйда қилидиған мадда байқалған.

Уйғур аптоном районлуқ сода -санаәт назарити тәрипидин бу йил 1‏-айдин 6‏- айғичә болған мәзгилдә елип берилған бу тәкшүрүш уйғур елиниң шәрқий вә җәнубий районлиридики һәр қайси дуканлар вә талла базарлиридики ун, яғ, гөш,көк-тат ақ һарақ, пивә, сүтлүк боюмлар вә балилар йимәкликлиридин болуп 857 хил йимәклик үстидин елип берилған. Нәтиҗидә буниң арисида 129 хили лаяқәтсиз чиққан.

Охшимиған 5 хил маркидики унда рак кесили кәлтүрүп чиқиридиған мадда байқалған болуп, бу хил мадда унни ақартиш ролини ойнайдикән. Буниңдин башқа йәнә, қумул, турпан вә ақсу қатарлиқ җайларда парчә қачиланған су майларниң лаяқәтсизлик дәриҗиси 65% кә йәткән.

Хитай хәвәр агентлиқиниң хәвәр қилишичә, өлчәмгә тошмиған бу су майларниң тәркивидики бәзи маддилар саламәтликкә зиянлиқ болуп, уни узун мәзгил истимал қилғанда, нервини бихудлаштуруп һәтта паләч қилиш еһтималлиқиму бар икән.

Шу сәвәптин сода-санаәт орунлири бундақ йимәкликләрни ишләпчиқарған завутларни тегишлик җазаға тартидиғанлиқини көрситип, истималчиларни йимәклик сетивалғанда чоң базарлардин вақти өтүп кәтмигән нәрсиләрни сетивелишқа, шундақла рәңги һәддидин зиядә ақ болған унларни сетивелиштин сақлинишқа чақирди.(Пәридә)