Teywen prézidénti ma yingju : teywenning amérika qorallirigha yenila éhtiyaji bar

Eywen prézidénti mayingju shenbe küni teybéyde bergen bayanatida, " gerche teywen we xitay munasiwetliri yéqinlishiwatqan bolsimu, lékin teywenning özini qoghdishi üchün yenila amérikining qoral - yaraqlirigha éhtiyaji bar" dégen.
Muxbirimiz ömer qanat xewiri
2008.07.12

 Teywen prézidénti bayanatida, teywen'ge qoral sétish mesiliside amérika siyasetchiliri otturisida bezi ixtilaplar otturigha chiqqanliqini, eskertken.

Amérika birleshme agéntliqining bildürüshiche, teywen hökümiti amérikidin F16 urushchi ayropilanliri we patroyt 3 namliq bashqurulidighan bombilar we apaché herbiy tik ucharliri qatarliq qoral we herbiy üsküniler sétiwélish telipini otturigha qoyghan.

Teywen prézidénti shenbe küni bergen bayanatida, teywen bilen xitay otturisidiki munasiwetlerning yéqinlishishi, teywen öz herbiy mudapi'e küchidin waz kéchidu dégenlik emes dep, körsetken.

Igileshlerge qarighanda, amérikidiki bezi siyasetchiler, xitay hökümitini ghezeplendürmeslik üchün, amérika hökümitining teywen'ge, teywen hökümiti telep qilghan qoral - yaraqlarni sétip bérishige tosqunluq qilishqa tirishmaqta.

Bu arida jüme küni, amérika mudapi'e minstirlikining sabiq mutexessisi gérg bérgensen, amérika - teywen herbiy munasiwetliri heqqidiki bezi mexpiyetliklerni, sodiger qiyapitige kiriwalghan amérikidiki bir xitay ishpiyonigha bergenliki üchün, jasusluq bilen eyiblinip, 5 yilliq qamaq jazasigha höküm qilindi.

Bergensen sottiki ipadiside, sodiger qiyapitige kiriwalghan xitay jasusi tey kaw ni teywen hökümitige yéqin bir kishi dep oylap, mezkur melumatlarni bergenlikini tekitligen.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.