Uyghur aptonom rayonining sékritari wang léchüen iranni ziyaret qildi


2006.04.18

Xelq'ara jem'iyet iran yadro pilanining tereqqiyatidin jiddiy endishe qiliwatqan bir chaghda, Uyghur aptonom rayoni partkomining sékritari wang léchüen iranni ziyaret qilip, xitayning iran bilen bolghan munasiwitini ilgiri sürüshke zor ehmiyet béridighanliqini bildürdi.

Xitay kompartiyisining wang léchüen yitekchilik qilghan wekiller ömiki düshenbe küni téhranda iranning ‏1 ‏- mu'awin prézidénti perwiz dawudi teripidin qobul qilindi. Shinxu'a axbarat agéntliqining eskertishiche, perwiz dawudi wangléchüen bashchiliqidiki xitay wekiller ömiki bilen junggo - iran munasiwiti boyiche "chongqur " pikir almashturghan. Lékin shinxu'a axbarat agéntliqi, ikki terepning qaysi konkrit mesililerde " chongqur" pikir almashturghanliqini tilgha almidi.

Perwiz dawudi wangléchüen'ge " iran bilen junggo nurghun xelq'ara zor mesililerde oxshash meydan'gha ige" dep tekitligen. Wang léchüen, xitay kompartiyisining irandiki siyasiy partiyiler bilen 4 prinsip asasida munasiwitini ilgiri sürüshke ehmiyet béridighanliqini eskertti. Xitay iranni nazuk herbiy téxnikilar bilen teminleydighan eng muhim döletlerning biri. Ikki dölet ötken yili sommisi ghayet zor miqdardiki néfit we tebiy gaz hemkarliqi kélishimi imzalighan.

Wangléchüen we xitay wekiller ömikining 14 ‏- aprilda bashlan'ghan ziyariti iran prézidénti exmedinijad, ötken hepte iranning qoyuqlandurulghan uran tawlap chiqqanliqini jakarlighandin kéyinla élip bérildi. Iran prézidéntining bayanatidin kéyin amérika tashqiy ishlar ministiri kondiliza rayis, b d t xewpsizlik kéngishini iran'gha qattiq qolluq bilen mu'amile qilishqa chaqirghan. Lékin iran prézidénti exmedinijad, gherb döletlirining bésimigha bash egmeydighanliqini we iranning uran tawlashni dawamlashturidighanliqini jakarlidi. Xitay xewpsizlik kéngishining iran'gha imbargo qoyushigha qarshi tirejimekte yaki waqitni keynige sozmaqta idi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.