Junggo bankisi térrorchilargha pul oborot qilish bilen eyiblendi

Isra'iliyide özlirini térrorluqning ziyankeshlikige uchrighan dep qaraydighan 100 din artuq isra'iliyilik peyshenbe küni xitayning eng chong bankiliridin biri bolghan junggo bankisi üstidin amérika sot mehkimisige erz sunup, mezkur bankining pelestin teshkilatlirigha pul oborot qilishni toxtitishini telep qildi.
Muxbirimiz erkin xewiri
2008.08.22

 Dawagerler amérikining los - anjélés rayonidiki sot mehkimisige sun'ghan eriznamiside junggo bankisining pelestin jahatchi teshkilatliridin xamas we islami jihad herikitige pul oborot qilip, isra'iliye da'irilirining pul aborotini toxtitish toghrisidiki teleplirige qulaq salmighanliqini ilgiri sürgen.

Dawagerlerning adwokati nitsana darshan - léytnér junggo bankisini " xamas we islami jihadning térrorluq hujum élip baridighanliqini bilip turup yardemde bolghan" shundaqla mezkur bankining amérikidiki shöbiliri arqiliq pul oborot qilishi amérika qanunigha xilap ikenlikini tekitligen.

Eriznamida, 2004 ‏ - yildin 2007 ‏ - yilghiche bolghan ariliqta yüz bergen hujumlarning maliye menbesi junggo bankisi oborot qilghan bu pullardin kelgenlikini eskertidu. Eriznamida dawagerler yene, 2003 ‏ - yili iyulning bashliri junggo bankisining bu teshkilatlar üchün bir qanche milyon dollar pul aborot qilghanliqini, bu pullarning köp qisimi ottura sherqـtin junggo bankisining amérikidiki shöbilirige yollan'ghanliqi, bu yerdin gu'angjudiki tarmaq bankisigha yötkelgenlikini bayan qilghan.

Isra'iliye da'iriliri 2005 ‏ - yili 4 ‏ - ayda xitay j x ministirliqi we merkizi bankisining emeldarliri bilen körüshüp, junggo bankisining pelestin teshkilatlirigha pul aborot qilishni toxtitishni telep qilghan idi. Eriznamida bu pullarning gherbiy qirghaq we gazadiki teshkilat bashliqlirigha yollinip, "térrorluq hujumlarni pilanlash we élip bérish üchün ishlitilgen" likini ilgiri sürgen. Lékin junggo bankisi bu mesile üstide hazirgha qeder pikir bildürmidi.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.