Хитай сақчилири җиддий һаләткә өтти

Хитай һөкүмитиниң көпинчә учур вастилири хитайниң қәшқәрдики әмәлдари ши дагаңниң сөзини нәқил елип, 4 ‏ - авғуст күни қәшқәрдә йүз бәргән вәқә һәққидә хәвәр бәргәндә 'әстайидил пиланланған һәрикәт', 'қораллири шәрқий түркистан ислам һәрикити тәрипидин тәрбийиләнгәнләрниң қораллириға охшайду' дәп вә әл - қаидичиләргә четип тәшвиқ қилишқа башлиди.
Мухбиримиз вәли хәвири
2008.08.06

 Бирләшмә агентлиқиниң қәшқәрдин хәвәр қилишичә, хитай сақчилири дүшәнбә күни абдурахман азат, қурбанҗан һемитләрниң һуҗумиға учриғандин кейин, хитай сақчилири бүгүндин башлап қәшқәр вә башқа җайларда толуқ қораллинип, җиддий һаләткә өтти. Кимлик тәкшүрүш рәсмийәтлирини техиму қаттиқлашти.

Хәвәрдә ейтилишичә, хитай даирилири бүгүн бирләшмә агентлиқиниң фото мухбирлириниң қәшқәр пойиз истансисиға вә пакистандин йолучилар келидиған җайға киришини чәклигән.

Хоңкоңда чиқидиған 'дагоңбав гезити' елан қилған хәвәрдә, хитайниң қәшқәрдики әмәлдари ши дагаң 4 ‏ - авғуст вәқәсини зораванлиқ шәкилдә елип берилған террорлуқ һәрикәт дәп бекитти, дәп баян қилди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.