Xitay oqughuchilarni Uyghur éligha makanlashturush tedbirliri ishqa ashurulmaqta

Ichkiridiki aliy mekteplerni püttürgen xitay yashlirini Uyghur éligha élip kélip orunlashturush üchün yolgha qoyuluwatqan "gherbiy rayonlargha yardem bérish" pilani boyiche her yili köpligen xitay yashliri Uyghur éligha kélip ishqa orunlashmaqta hemde ularning köpchiliki yaxshi imtiyaz we parawanliq kapaletliri astida Uyghur élida makanlishishi pursitige érishmekte.

Gherbiy rayonlargha yardem bérish pilanidin bashqa yene 2000- yili, xitay ma'arip ministirliki, xitay kompartiyisi merkiziy komitéti teshwiqat idarisi qatarliq orunlar teripidin tesis qilin'ghan " gherbni échish oqush mukapat layihisi" dep atalghan righbetlendürüsh hem yardem bérish oqush mukapat sommisi yéqinda ishlepchiqirish qurulush armiyisining asasliq bazisi hésablinidighan shixenze shehiridiki 38 neper xitay aliy mektep oqughuchisigha bérilgen.

Igilishimizche, mutleq zor sanni xitaylar igiligen shixenze uniwérsitétida ötküzülgen mukapat bérish murasimida mukapatqa layaqetlik bolghan her bir oqughuchi 5000 ming yüendin neq pulgha érishken. Murasimda söz qilghan oqughuchilar wekilliri özlirining shinjangda qélip, partiye, hökümet we jem'iyet üchün xizmet qilidighanliq wedilirini bildürüshken. Shinjang xewer torining bu heqtiki bir xewirige asaslan'ghanda, hazirghiche, ishlepchiqirish qurulush armiyisining 8-diwiziyisidiki 60 neper oqughuchi bu mukapatqa érishken.

Uzun yil shixenzidiki aliy oqutush orunlirida xizmet qilghan bir erbabning éytishiche, mezkur oqush mukapat pilani asasliqi bingtü'endiki xitay oqughuchilargha qaritilghan bolup, nöwette, bingtü'endiki xitaylarning xitay merkiziy hökümitining bezi siyasetlirige bolghan naraziliqliri küchlük bolmaqta, hetta bir qisim xitaylar perzentlirining mumkin qeder ichkiri sheherlerdin ish tépip kétishini arzu qilidu. (Ümidwar)