Guyjoda saqchilar bilen puqralar arisida toqunush yüz berdi

6 - Ayning 28 - küni guyjo ölkisining wén'an nahiyiside saqchilar bilen puqralar toqunushup qélip, ademlerning yarilinish we mashinilarning köydürülüsh weqeliri kélip chiqqan.
Muxbirimiz ümidwar xewiri
2008-06-29
Élxet
Pikir
Share
Print

 B b s agéntliqining igilishiche, toqunushqa seweb bolghan amil jama'et xewpsizlik ornining bir qizni öltürüwétish weqesige munasiwetlik jinayet gumandarining délosini bir terep qilishta adil bolmighanliq bilen kélip chiqqan iken.

Shenbe küni kechte guyjoning merkizi guyyang shehirining shimalidiki wén'an shehiride kélip chiqqan bu toqunushta narazi bolghan puqralar jama'et xewpsizlik idarisining binasigha ot qoyuwetken. Amérika awazi radi'osining türlük uchur yolliri arqiliq igilishiche, guyjoning her qaysi jayliridin 1500 neper saqchi yötkep kélinip, namayishchilarni bésiqturghan bolup, toqunush jeryanida on ming etrapida namayishchi puqra jama'et xewpsizlik binasini qorshiwalghan.

Junggo kishilik hoquq uchur merkizining igilishiche, saqchi mashinisini öz ichige alghan 20 aptomobil köydürüwétilgen. Bir namayishchi saqchilar bilen toqunush jeryanida öltürülgen, 150 din artuq adem yarilan'ghan. Yekshenbe küni weziyet tinchlandurulghan. Xewerlerde körsitilishiche, 16 yashliq bir qiz üch neper yash teripidin aldap élip kétilip, basqunchiliq qilishqa uchrighan hemde ular teripidin öltürüwétilgen.

Qatillarning ikkisi jama'et xewpsizlik da'irilirining tughqanliri bolghanliqi üchün, ular gunahsiz dep qarilip qoyup bérilgen. Bu weqe puqralarning qattiq naraziliqini qozghighan iken.

Hazirghiche xitay hökümet terep weqening jeryani heqqide resmiy uchur tarqatmighan bolsimu, lékin yekshenbe küni shinxu'a agéntliqi wén'an nahiyiside urup chéqish weqesining tinchlandurulghanliqi heqqide qisqa xewer tarqitip, heqiqeten shundaq ishning bolghanliqini étirap qilghan. Weqening tepsilatini kishilik hoquq pa'aliyetchiliri türlük yollar bilen igilep, sirtqa tarqatqan.
Toluq bet