Фуҗуда бир хитай аптобус партлаш иғваси тарқатқанлиқи үчүн қолға елинди

Йеқиндин буян хитай өлкилиридә арқа - арқидин йүз бериватқан аптобус партлитиш вәқәлири аммини сарасимигә селиватқан болуп, фуҗу шәһиридә бир хитай аптобусқа партлитиш бомбиси қоюлғанлиқи һәққидә иғва тарқитип, кишиләрдә әндишә қозғиғанлиқи үчүн , сақчилар тәрипидин рәсмий қолға елинған.
Мухбиримиз гүлчеһрә хәвири
2008.07.29

 Хитай хәвәр агентлиқиниң бу һәқтики хәвиридә, фуҗу шәһәрлик җамаәт хәвпсизлик идариси башлиқиниң сөзини нәқил елишичә, 26 - июл күни бир киши, фуҗу сақчи даирилиригә 949 йол аммиви қатнаш аптобусиға бомба орнитилғанлиқи һәққидә сөз аңлиғанлиқини мәлум қилғандин кейин, алаһидә сақчи һәрикәт қисимлири һәм қораллиқ қисимлар дәрһал һәрикәткә кәлгән.

Партлитиш бомбиси қоюлған дәп гуманланған аптобустин бомба чиқмиғандин кейин,сақчилар даириләрни һәм аммини аптобус партлаш иғваси тарқитип сарасимигә салған чен фамилилик кишини бир қанчә саәт ичидә қолға алған.

Сорақ җәрянида бу иғва тарқатқучиниң сақчиларға иқрар қилишичә, 26 - июл күни чүштин кейин чен 949 йол аптобусиға олтурмақчи болған , аптобусқа чиқиш җәрянида аптобус униң путини қисивалған, буни аптобус шопуридин көргән чин өч елиш мәқситидә, аптобус ширкитигә телефон қилип бу аптобусқа партлитиш бомбиси қоюлғанлиқи һәққидә ялған хәвәр бәргән икән.

Йүннән өлкиси күнмиң шәһиридә дүшәнбә күни кәчқурун бир йолучилар аптобусида партлаш һадисиси йүз бәргән болуп, күнмиң шәһири бихәтәрлик органлири баянат елан қилип, аптобус партлаш вәқәсиниң, пиланлиқ йосунда елип берилған болсиму, лекин террорчилиқ билән алақиси йоқлуқини оттуриға қойған иди. Әмма бу вәқә охшашла хитай бихәтәрлик даирилирини бир мәзгил җиддийләштүргән.

Шинхуа ториниң хәвиригә қариғанда, үрүмчи сақчи даирилири бейҗиң олимпики давамида бихәтәрликкә капаләтлик қилиш үчүн, 20 - июлдин башлап үрүмчи шәһәр ичидики 129 қатнаш линийисидә қатнайдиған җәмий 3700 аптобус үстидин бихәтәрлик тәкшүрүши елип беришқа башлиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.