Сичүәндә йүз бәргән йәр тәврәштә хитайниң һәрбий санаити еғир зәхмиләнгән

 'Америка авази' бу қетимқи йәр тәврәштә хитайниң ядро тәтқиқат тәҗрибиханиси вә уран тавлайдиған завути җайлашқан мйәняң шәһириниң гуаңюән дегән йеридә 10 нәччә миң адәм өлди, дәп баян қилған иди. Хитай дөләт мудапиә пән ‏ - техника санаәт идарисиниң башлиқи чен чюфа йеқинда 'җуңгониң һәрбий санаити сичүәндә йүз бәргән йәр тәврәштә қаттиқ зәхмиләнди' деди. Гәрчә хитай һөкүмити сичүәндә йүз бәргән йәр тәврәштин кейинла, 'җуңгониң ядро тәтқиқат әслиһәлири тамамән бихәтәр' дәп җакарлиған болсиму.

Хәвәрдә баян қилинишичә, әнглийидики җәйнис мудапиә нәшрият гурупписиниң баян қилишичә, сичүәндә йүз бәргән йәр тәврәштә хитайниң һәрбий санаити вә ядро әслиһәлири еғир дәриҗидә зәхмиләнгән, көрүлгән зиян тәхминән 67 милярд йүән.

'Хитай хәвәр тори'ниң баян қилишичә, йәр тәврәш йүз бәргән венчуән райони тибәтләр топлишип олтурақлашқан район иди. Һазир тебәт мәсилисиниң хәлқарада барғансери сәзгүр мәсилә болуп қеливатқанлиқи вә хитайниң ядро әслиһәлириниң йәр тәврәштин кейинки әһвали хитай һөкүмитиниң өзигиму техичә ениқ болмиғанлиқи үчүн, хитай һөкүмити чәтәлләрниң қутқузуш әтрәтлириниң келишини рәт қилған.