Ürümchide 35 neper xristi'an muriti saqchilar teripidin tutup kétildi

Saqchilar yéqinda Uyghur aptonom rayonining merkizi ürümchi etrapidiki maral köli terepke toghra kélidighan bir taghliq yézini qorshap, mezkur yézida injil kursigha qatnishiwatqan 33 neper xristi'an muriti, bir xristi'an missi'onér we uning terjimanini tutup ketti.

Xewer menbe'eside weqe yüz bergen jayni chilin yézisi, dep atighan. Mezkur kurs amérika tewelikidiki bir koriyilik missi'onér teripidin muritlargha injil toghrisida telim - terbiye bérish üchün échilghan bolup, saqchilar tutqunlarni yongféng baziridiki saqchixanigha élip bérip soraq qilghan.

Amérikining téksas shtatidiki jonggo yardem jem'iyiti, dep atlidighan xristi'an uyushmisi, saqchilarning soraq jeryanida tutqunlarni qiyin - qistaqqa alghanliqini bildürdi. Yardem jem'iyiti bu heqtiki bayanatida yerlik saqchi da'iriliridin xristi'an muritlirini téz arida qoyup bérishni telep qilip, ularning diniy étiqadi xitay jem'iyiti we xitay dölitige ziyan élip kelmeydighanliqini tekitligen.

Mezkur jem'iyet teminligen isimlikke qarighanda injil kursigha qatnashqan kishilerning köpchiliki xitaylar bolushi mumkin. (Erkin)