ئىستانسىمىز پەيشەنبە كۈنى ئاپەتتە قازا قىلغان چەندى ئوتتۇرا مەكتەپ ئوقۇغۇچىلىرىنىڭ ئاتا - ئانىلىرىنىڭ، شەھەرلىك ھۆكۈمەت بىناسى ئالدىدا ئىككى كۈن نارازىلىق نامايىشى ئېلىپ بارغانلىقىدىن خەۋەردار بولدى.
نۇرغۇنلىغان ئوقۇغۇچىلارنىڭ ئۆلۈمىنى مەيدانغا كەلتۈرگەن تۈپ سەۋەبنىڭ، يەر تەۋرەشكە بەرداشلىق بېرەلمەيدىغان سۈپەتسىز قۇرۇلۇش تۈپەيلىدىن ئىكەنلىكىنى بىلدۈرگەن ئاتا - ئانىلار، ئۆرۈلۈپ چۈشكەن ئوقۇتۇش بىناسى ئەتراپىدىكى قۇرۇلۇشلارنىڭ يەر تەۋرەشنىڭ تەسىرىگە ئۇچرىمىغانلىقىنى، شۇڭا دەرھال جاۋابكارلارنىڭ مەسئۇلىيىتىنىڭ سۈرۈشتە قىلىنىشىنى تەلەپ قىلغان.
مۇتەخەسسىسلەرنىڭ تەكشۈرۈش نەتىجىسىنى قولغا ئېلىپ ئاندىن ئاتا - ئانىلارغا جاۋاب بېرىدىغانلىقىنى بىلدۈرگەن شەھەرلىك ھۆكۈمەت خادىملىرى، ئاتا- ئانىلارنىڭ بىر مۇددەت كۈتۈپ تۇرۇشىنى تەلەپ قىلغان.
پەرزەنتىدىن ئايرىلغان بىر ئاتا ئىستانسىمىزنىڭ زىيارىتىنى قوبۇل قىلىپ، ئەگەر ھۆكۈمەت تەرەپ مۇشۇ ئاينىڭ 10 - كۈنىگە قەدەر ئۆزلىرىگە ئېنىق جاۋاب بەرمىسە، بارلىق ئاتا - ئانىلارنىڭ باشقىچە بىر ھەرىكەت قوزغايدىغانلىقىنى تەكىتلىدى. ھۆكۈمەت ئاخبارات ئورگانلىرى بۈگۈن، يەر تەۋرەشتە ئۆلگەنلەر سانىنىڭ 70 مىڭغا يېقىنلاشقانلىقىنى ئېلان قىلدى.