អ្នកភូមិជនជាតិភាគតិចជាង ១០០នាក់នាំគ្នាតវ៉ារឿងដីធ្លីនៅរតនគិរី
ដោយ រដ្ឋា វិសាល
2008-08-21
អ្នកភូមិតងក្រពូ ស្រុកអូរជុំ ខេត្តរតនគិរី ប្រមាណជាង ១០០នាក់ មានប្រុសស្រីក្មេងចាស់ នៅព្រឹកថ្ងៃទី២០ សីហា ២០០៨ បានលើកគ្នាជាថ្មីទៀត ទៅតវ៉ាទាមទារដីប្រជាសហគមន៍ ដែលត្រូវបានឈ្មួញអ្នកទិញដីយកគ្រឿងចក្រទៅឈូសឆាយយកធ្វើជាសម្បត្តិឯកជន។
ពុំមានអំពើហិង្សាអ្វីកើតមាននៅក្នុងហេតុការណ៍នោះទេ ក៏ប៉ុន្តែគេសង្កេតឃើញពុំមានវត្តមានឈ្មួញអ្នកទិញដីនិងអាជ្ញាធរមូលដ្ឋានចេញមុខដោះស្រាយបញ្ហាជាមួយអ្នកភូមិនោះឡើយ។
តំណាងអ្នកភូមិ ថ្លែងយ៉ាងដូច្នេះថា ៖ «ប្រជាជនភូមិតងក្រពូទាំងអស់ តវ៉ារឿងដី គឺត្រូវការដកហូត។ គាត់ថា ទោះជាឲ្យលុយគាត់ ៥ម៉ឺនដុល្លារ ១០ឆ្នាំទៅមុខទៀត ក៏គាត់អត់ឲ្យដែរ។ ប៉ះពាល់ដំណាំរបស់គេ ប៉ះពាល់ស្រូវមួយចំនួន ប្រជាពលរដ្ឋដល់អ៊ីចឹង គេថា គេស្លាប់រស់ក៏ដោយ គេខំតវ៉ា»។
តាមការពិនិត្យឃើញជាក់ស្តែង គ្រឿងចក្រសម្រាប់ឈូសឆាយដីមួយគ្រឿង កំពុងធ្វើការឈូសឆាយនៅលើដីព្រៃចម្ការវិលជុំរបស់អ្នកភួមិនិងផ្នែកខ្លះជាចម្ការស្វាយចន្ទីនិងចម្ការដាំស្រូវ ហើយមេការទទួលខុសត្រូវនៅទីនោះបដិសេធមិនធ្វើអត្ថាធិប្បាយនិងហាមមិនឲ្យមានការថតរូបភាព។ ហើយក្នុងការជួបសម្ភាសន៍របស់វិទ្យុអាស៊ីសេរីជាមួយអ្នកស្រី សេក ម៉ូនា ភរិយាលោក សេង ពិសិដ្ឋ ឈ្មួញទិញដី ជាង ៣០នាទី អ្នកស្រីមិនអនុញ្ញាតឲ្យថតសំឡេងនិងមិនអនុញ្ញាតឲ្យផ្សាយពីខ្លឹមសារសម្ភាសន៍នោះឡើយ។
មន្រ្តីស៊ើបអង្កេតនៃសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ ៖ «ពីរលើកហើយ លើកទីមួយ គាត់សម្ដែងការមិនពេញចិត្តនៅមុខសាលាខេត្ត ហើយនេះគាត់ទៅសម្ដែងការមិនពេញចិត្តដោយអហិង្សាចំពោះការកាប់រានឈូសឆាយនៅលើដីរបស់គាត់ហ្នឹង។ អាជ្ញាធរដែនដីនិងប្រព័ន្ធយុត្តិធម៌ ត្រូវរកយុត្តិធម៌ឲ្យគាត់ មិនមែននៅតែកន្លែងភូមិតងក្រពូមួយទេ គឺទូទាំងខេត្ត»។
តាមឯកសារថតចម្លងដែលវិទ្យុអាស៊ីសេរីទទួលបានពីអ្នកភូមិ ឲ្យដឹងថា អ្នកពាក់ព័ន្ធក្នុងការផ្ទេរសិទ្ធិកាន់កាប់ដីជម្លោះខាងលើ គឺអភិបាលស្រុកអូរជុំ លោក បៀន ធ្វើន និងអភិបាលរង លោក តាវែង ធើ អ្នកភូមិតងក្រពូ ឈ្មោះ ខែង ចន្ថា និង ចន្ថា សុខ បានប្រគល់ដីសរុបជិត ២០ហិកតា ឲ្យលោក សេង ពិសិដ្ឋ នៅខែកក្កដា ឆ្នាំ២០០៨។ ក៏ប៉ុន្តែលោកអភិបាលស្រុកបានបដិសេធ។
លោក បៀន ធ្វើន មានប្រសាសន៍ថា ៖ «លោកណាក៏ដោយក្នុងភូមិ បើធ្វើការឯចម្ការ ក្នុងភូមិក្នុងសហគមន៍របស់ខ្លួន អត់អីទេ ខ្ញុំថា ខ្ញុំនឹងស្ងាត់ស្ងៀម។ ឆ្នាំនេះ ជនខិលខូចមួយចំនួនតិច ធ្វើចម្ការក្នុងប្លង់ហ្នឹង គាត់លក់ឲ្យអ្នកផ្សេងវិញទៅ»។
កាលពីថ្ងៃច័ន្ទ អ្នកភូមិតងក្រពូ ៥៣នាក់ បាននាំគ្នាមកសុំកិច្ចអន្តរាគមន៍ពីអភិបាលខេត្តរតនគិរី ដើម្បីបញ្ឈប់ការឈូសឆាយ ហើយទាមទារដីទុកជាប្រយោជន៍សហគមន៍អភិរក្សជាតំបន់ការពារដើម្បីព្រៃឈើដុះលូតលាស់វិញ។ ក៏ប៉ុន្តែអភិបាលខេត្ត លោក មួង ប៉យ បដិសេធដោយចោទមន្ត្រីអាដហុកថា នាំអ្នកភូមិមកច្រើនហាក់មានបំណងធ្វើបាតុកម្មនិងមានការបិទទ្វាររបងសាលាខេត្ត ហើយប៉ូលិសបានដេញបំបែកអ្នកភូមិ។
យ៉ាងនេះក្តី ព្រះរាជអាជ្ញាអមតុលាការខេត្ត លោក ម៉ី សាខន បញ្ជាក់ថា លោកសូមឲ្យអ្នកភូមិគួរផ្អាកសកម្មភាពតវ៉ាចៀសវាងកើតមានអំពើហិង្សា ហើយលោកនឹងពិនិត្យករណីនេះ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
ពលរដ្ឋនៅភូមិជ័យសេនា ស្រុកឈូក ខេត្តកំពត ប្រឈមនឹងការបណ្ដេញចេញពីលំនៅ
ពលរដ្ឋនៅស្រុកបាភ្នំខេត្តព្រៃវែងចោទថា មន្ត្រីសុរិយោដីយកពន្ធការផ្ទេរកម្មសិទ្ធិដីធ្លី
ខ្ទមចាំចម្ការរបស់អ្នកភូមិប៉ាតាង ខេត្តរតនគិរី ត្រូវក្រុមហ៊ុនដុតបំផ្លាញ
ជម្លោះដីធ្លីនៅឃុំឈូកស ស្រុកកំពង់ត្រឡាចខេត្តកំពង់ឆ្នាំង
អ្នកភូមិនៅរតនគិរីស្វែងរកកិច្ចអន្តរាគមន៍ពីស្ថានប័នជាតិនិងសិទ្ធិមនុស្ស
ទំនាស់ដីធ្លីនៅស្រុកបាធាយ ខែត្រកំពង់ចាម
មនុស្ស៣នាក់ត្រូវតុលាការខេត្តកំពង់ឆ្នាំងចាប់ខ្លួនក្នុងករណីវិវាទដីធ្លី
ក្រសួងព័ត៌មានសុំអន្តរាគមន៍ពីនាយករដ្ឋមន្ត្រីជុំវិញបញ្ហាទំនាស់ដីនៅក្រុងព្រះសីហនុ
ពលរដ្ឋមួយក្រុមនៅខែត្រកំពតតវ៉ាប្រឆាំងការរឹបអូសយកដីធ្លី
ព្រៃចម្ការរបស់អ្នកភូមិនៅរតនគិរីត្រូវគេកាប់ទន្ទ្រានយកដី
