ស្ត្រីឈ្មោះ កឿន យឿន អាយុ៤៣ឆ្នាំ ប្តីគាត់ជាទាហានក្នុងកងពលអន្តរាគមន៍លេខ១៤ មានប្រសាសន៍ថា គាត់បានមករស់នៅតំបន់នេះតាំងពីឆ្នាំ១៩៨៥។ គាត់បញ្ជាក់ពីមូលហេតុដែលគាត់មករស់នៅតំបន់នេះថា ដោយអង្គភាពដែលប្តីគាត់ធ្វើការមានទីតាំងនៅក្បែរតំបន់នេះ ៖ «មកនៅទីនេះតាមប្ដីគាត់ធ្វើទាហាន គាត់នៅបន្ទាយហ្នឹង។ នៅហ្នឹងសុខចេះតែនៅទៅ»។
ស្ត្រីវ័យ៦៧ឆ្នាំឈ្មោះ ហែម ជាតិ មានប្រសាសន៍ថា គាត់មករស់នៅតំបន់នេះតាមកូនប្រុសគាត់ជាទាហានក្នុងកងពលអន្តរាគមន៍លេខ១៤ដែរ តែឥឡូវកូនគាត់បានពលីជីវិតទៅហើយ ដោយបន្សល់ទុកនូវចៅកំព្រា៤នាក់ក្នុងបន្ទុកដែលលោកយាយត្រូវរែកពុន។ គាត់បន្តថា ប្រសិនបើត្រូវបណ្តេញចេញដោយមិនមានការផ្តល់ដីធ្លីទេនោះ គាត់និងចៅមិនដឹងជាត្រូវរស់នៅទីណាទេ។
អ្នកស្រី ហែម ជាតិ បានឲ្យដឹងដូច្នេះ ៖ «ពីដើមកូនទៅធ្វើទាហាននៅកន្លែងនោះ ដល់ពេលគេផ្លាស់ទៅលិចទៅកើតទៅ ក៏ខ្ជិលរើទៅតាមកូនក៏នៅនឹងដីម៉ៃសាក់ហ្នឹងទៅ គេគ្មានដេញអីទេ ដល់តែឥឡូវស្រុកសន្តិភាពស្រួលបួលអ៊ីចឹងទៅ គេទាមទារយកដីរដ្ឋហ្នឹងវិញ»។
មេភូមិទួលក្រួសគឺលោក តុង សារឿន ទទួលស្គាល់ថា ប្រជាពលរដ្ឋទាំង១០គ្រួសារនេះពិតជាបានមករស់នៅជាយូររណាស់មកហើយ។
ចៅសង្កាត់ចម្រើនផល គឺលោក ឈុន សៀង មានប្រសាសន៍ថា សាលាសង្កាត់បានបញ្ចូលឈ្មោះប្រជាពលរដ្ឋក្នុងតំបន់នេះចូលក្នុងបញ្ជីពលរដ្ឋក្រីក្រគ្មានដីធ្លីរួចហើយ រង់ចាំគោលការណ៍ដោះស្រាយពីថ្នាក់លើ។
លោក ឈុន សៀង មានប្រសាសន៍ដូច្នេះ ៖ «ធ្វើជំរឿនអស់ហើយ អ្នកដែលអត់ដីមានប៉ុន្មានៗ យើងធ្វើផែនការបញ្ជូនទៅអស់ហើយ។ ដូចខ្ញុំបានទៅធ្វើសិក្ខាសាលានៅកន្លែងភូមិបាល អ៊ីចឹងយើងធ្វើអស់ហើយ ការលំបាកអត់ដីអី ដល់គាត់អត់ដឹងគាត់ចេះតែភ័យខ្លាច»។
អភិបាលរងក្រុងពោធិ៍សាត់ គឺលោក ហាវ សារឿន មានប្រសាសន៍ថា សាលាក្រុងបានរៀបចំរួចរាល់អស់ហើយ។ ប្រជាពលរដ្ឋទាំងនោះនឹងទទួលបានដីសង្គមកិច្ចនៅពេលខាងមុខ ៖ «ប្រជាពលរដ្ឋដែលនៅតាមមាត់ស្ទឹងក្ដី នៅតាមប្រឡាយក្ដី គេសុទ្ធតែមានគោលការណ៍ដើម្បីដាក់បញ្ចូលក្នុងដីសម្បទានសង្គមកិច្ច ប៉ុន្តែគោលការណ៍ដីសម្បទានវាអត់មានកំណត់ដីចែក»។
តាមឯកសារផែនការប្រើប្រាស់ដីក្នុងសង្កាត់ចម្រើនផល បានបង្ហាញថា ក្នុងសង្កាត់នេះមានប្រជាពលរដ្ឋចំនួន១៥គ្រួសារ ដែលភាគច្រើនជាគ្រួសារយោធាបានមកតាំងទីលំនៅដោយខ្លួនឯងលើដីព្រៃ ដីចំណីផ្លូវ ដីចំណីស្ទឹងជាដើមដែលតំបន់ទាំងនោះរដ្ឋត្រូវរៀបចំឡើងវិញ៕