គណបក្សនយោបាយ១០ចូលរួមវេទិកាស្ដីពីច្បាប់ប្រឆាំងអំពើពុករលួយ

ដោយ អ៊ុក សាវបូរី

2008-07-08

គណបក្សចំនួន១០ក្នុងចំណោម១១ចូលរួមបោះឆ្នោតសភាលើកទី៤ ប្តេជ្ញាប្រយុទ្ធប្រឆាំងអំពើពុករលួយ នៅគ្រាដែលគណបក្សប្រជាជនកម្ពុជាមិនចូលរួមក្នុងវេទិកាគណបក្សនយោបាយ ស្តីពីច្បាប់ប្រឆាំងអំពើពុករលួយនិងវិធានការអនុវត្តច្បាប់ដែលរៀបចំដោយអង្គការខុមហ្វ្រែល នៅថ្ងៃអង្គារ ទី៨ ខែកក្កដា ។

RFA Photo

សកម្មជននៃអង្គការសង្គមស៊ីវិលនាំគ្នាដង្ហែក្បួនធ្វើយុទ្ធនាការទាមទារឲ្យរដ្ឋាភិបាលពន្លឿនការធ្វើច្បាប់ប្រឆាំងអំពើពុករលួយកាលពីចុងឆ្នាំ២០០៦ ។

វាគ្មិនមកពីគណបក្សនយោបាយទាំង១០បានសម្ដែងជំហរថានឹងជំរុញឲ្យច្បាប់ប្រឆាំងអំពើពុករលួយឆាប់មានក្នុងរដ្ឋាភិបាលថ្មី ហើយអនុវត្តច្បាប់នោះឲ្យបានចំទិសដៅ ។

លោក មុត ចន្ថា តំណាងគណបក្ស នរោត្តម រណឫទ្ធិ បានមានប្រសាសន៍ថា ៖ «បង្កើតឲ្យមានការចូលរួមរបស់សង្គមស៊ីវិលក្នុងការតាមដាន វាយតម្លៃ និងផ្ដល់ព័ត៌មានទាក់ទងនឹងអំពើពុករលួយ និងសកម្មភាពអំពើពុករលួយ» ។

លោក អ៊ុក ភូរិ ប្រធានគណបក្សប្រជាធិបតេយ្យខ្មែរ នឹងដំឡើងប្រាក់ខែមន្រ្តីរាជការ ។

លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានមានប្រសាសន៍ថា ៖ «គឺការកាត់បន្ថយអំណាចរដ្ឋដើម្បីឲ្យអ្នកកាន់ការងារស្រុកទេសហ្នឹងមានការទទួលខុសត្រូវលើទង្វើរបស់គាត់» ។

លោក ក្រវ៉ាញ់ ដារ៉ន ប្រធានគណបក្សខ្មែរឈប់ក្រ បានមានប្រសាសន៍ថា ៖ «បង្កើតប្រព័ន្ធគណនីគ្រប់ខេត្តក្រុងតាំងពីលើដល់ថ្នាក់ក្រោម» ។

លោក ប៉ែន វ៉ាណូ អគ្គលេខាធិការគណបក្សសង្គមយុត្តិធម៌ បានមានប្រសាសន៍ថា ៖ «សូមឲ្យអ្នករាជការទាំងអស់មានគណនីជាដាច់ខាត ។ លុយចូលក្នុងគណនីដើម្បីស្រួល លុយចូលមកពីណា ចេញទៅណាម៉ោងណាក៏ដឹងដែរ» ។

លោក យឹម សុវណ្ណ គណបក្សសមរង្ស៊ី បានមានប្រសាសន៍ថា ៖ «ទាមទារឲ្យជនពុករលួយដែលបានកិបកេងទ្រព្យសម្បត្តិជាតិក្នុងតំណែងរបស់ខ្លួនកន្លងមកហ្នឹង គឺត្រូវតែយកលុយនោះមកដាក់ចូលឃ្លាំងរដ្ឋវិញ» ។

លោក ភោគ ផុន គណបក្សហង្សដារ៉ាចលនាប្រជាធិបតេយ្យ បានមានប្រសាសន៍ថា ៖ «នឹកគិត និយាយ ធ្វើ ចិញ្ចឹមជីវិតដោយត្រឹមត្រូវ ហើយនិងព្យាយាម ហើយនិងសម្បជញ្ញៈ... ៨នេះវាជាតួអង្គរបស់មនុស្សគ្រប់រាងកាយ កាលណាអត់៨នេះគឺធ្លាក់ជ្រោះ» ។

លោក គាត សុគុណ តំណាងគណបក្សសិទ្ធិមនុស្ស បានមានប្រសាសន៍ថា ៖ «យើងត្រូវបង្កើតគណៈកម្មាធិការជាតិមួយ បង្កើតស្ថាប័នឯករាជ្យមួយបោសសម្អាតអំពើពុករលួយដែលត្រូវបង្កើតឡើងដោយសភាទទួលខុសត្រូវចំពោះមុខរដ្ឋសភា» ។

ជនពិការមកពីខេត្តកំពង់ស្ពឺអះអាងថា អំពើពុករលួយធ្វើឲ្យគាត់បាត់បង់ប្រាក់ឧបត្ថម្ភមូលដ្ឋាន១០ឆ្នាំមកហើយ ៖ «ប្រាក់វិលមូលដ្ឋាននោះគេឲ្យក្នុងម្នាក់៦០ម៉ឺនរៀល តែបច្ចុប្បន្នក្រសួងគេបានកំណត់ថាឲ្យម្នាក់ទទួលបានតែ១០ម៉ឺនឬក៏៥ម៉ឺនរៀល ។ តែអាបាត់វាប្រហែលជា៣០-៤០ម៉ឺនរៀលទៀត មិនដឹងគេស៊ីត្រឹមថ្នាក់ខេត្ត ឬក៏ត្រឹមថ្នាក់អីគឺបាត់អស់តែម្ដង» ។

និសិ្សតមកពីសកលវិទ្យាល័យភូមិន្ទភ្នំពេញឲ្យដឹងថា ចង់បានច្បាប់ប្រឆាំងអំពើពុករលួយអនុវត្តក្នុងរដ្ឋាភិបាលថ្មី ដើម្បីបញ្ចប់ការទិញដូរតំណែងការងារនិងការសិក្សា ៖ «មាតាបិតាចង់ឲ្យកូនជាប់ឡើងថ្នាក់ ឬក៏បានការងារធ្វើ មាតាបិតាត្រូវចំណាយលុយដើម្បីសូកប៉ាន់» ។

និស្សិតម្នាក់ទៀតនិយាយថាគ្មានច្បាប់ប្រឆាំងអំពើពុករលួយនាំឲ្យប្រទេសកម្ពុជាទន់ខ្សោយ ។

តាមមន្រ្តីក្រៅរដ្ឋាភិបាលរៀបចំវេទិកាគណបក្សនយោបាយស្តីពីច្បាប់ប្រឆាំងអំពើពុករលួយឲ្យដឹងថា គណបក្សប្រជាជនកម្ពុជាមិនចូលរួមជជែកនៅថ្ងៃនេះ ដោយផ្ញើលិខិតមកថាក្រៅពីវេទិការៀបចំដោយគណៈកម្មាធិការជាតិរៀបចំការបោះឆ្នោតគណបក្សនោះមិនចូលរួមទាំងអស់ ។

សូមជម្រាបថាប្រទេសកម្ពុជាត្រូវបានក្រុមអង្គការសង្គមស៊ីវិលរកឃើញថា ប្រាក់ចំណូលជាតិត្រូវបាត់បង់យ៉ាងហោចណាស់៥០០លានដុល្លារអាមេរិកក្នុង១ឆ្នាំៗ ដោយសារអំពើពុករលួយ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព