ទំហំដីធ្លី ដែលកំពុងតែប្រឈមមុខ និងការរឹបយកនោះ មានចំនួនជាង ២០ ហិកតារ។ តំបន់ដែលមានទំនាស់នោះ គេហៅថា បឹងឈូក។ ប្រជាពលរដ្ឋចំនួន ១៣ គ្រួសារ បានអះអាងថា ពួកគាត់មានឯកសារកម្មសិទ្ធិត្រឹមត្រូវក្នុងការកាន់កាប់លើដីនោះ។
ប្រជាពលរដ្ឋសង្កាត់ព្រែកប្រាមួយរូបឈ្មោះ យឹម សុផល អាយុ ៥៣ ឆ្នាំ បានថ្លែងថា ដីធ្លីរបស់លោក ដែលកំពុងតែចិញ្ចឹមត្រីតាំងពីឆ្នាំ ២០០៥ មក ត្រូវបានក្រុមហ៊ុន សូគីម៉ិច បោះបង្គោលព័ទ្ធយកដោយគ្មានសំណង។
លោក យឹម សុផល ៖ «បើសិនជាគេហ៊ុមព័ទ្ធ ហើយធ្វើប្លង់យក គឺបាត់បង់ទាំងស្រុងហើយ។ គ្មានវិធីអ្វីក្រៅអំពីសុំដល់សម្ដេចនាយករដ្ឋមន្ត្រី ហ៊ុន សែន សុំឲ្យសម្ដេចជួយពិនិត្យសំណុំរឿងរបស់ប្រជាពលរដ្ឋទាំង ១៣ គ្រួសារនេះឡើងវិញ ព្រោះកន្លងមកយើងខ្ញុំទាំងអស់គ្នា បានគិតគូរធ្វើលិខិតស្នាម ជម្រាបជូនសម្ដេចច្រើនលើកច្រើនសាហើយ តែទៅមិនដល់»។
លោកបានឲ្យដឹងថា ពាក្យបណ្ដឹងរបស់ប្រជាពលរដ្ឋ មិនត្រូវបានអាជ្ញាធរមូលដ្ឋាន ដោះស្រាយទេ។ ការងើបតវ៉ាកន្លងមក ត្រូវបានអាជ្ញាធរហាមឃាត់។
ប្រជាពលរដ្ឋឈ្មោះ លឹម បាក់ជូរ អាយុ ៥៦ បានថ្លែងថា ដីរបស់លោកស្រី ដែលមានចំនួន ៣ ហិកតារកន្លះ កំពុងតែប្រឈមមុខការរឹបយក។
លោកស្រី លឹម បាក់ជូរ ៖ «ត្រូវតែរកយុត្តិធម៌សងខ្ញុំមក។ យ៉ាងម៉េចក៏មកយកដីខ្ញុំ? ខ្ញុំកាន់កាប់ជិត ១០ ឆ្នាំមកហើយ។ ពេលខ្ញុំលើកទំនប់ ម៉េចគេមិនឃាត់ខ្ញុំពេលហ្នឹង។ បើពេលហ្នឹង គេមកឃាត់ខ្ញុំ ខ្ញុំក៏អត់ទិញគេទេ ហើយអត់ឲ្យលុយគេទេ»។
ចៅសង្កាត់ព្រែកប្រា ខណ្ឌមានជ័យ ជាយក្រុងភ្នំពេញ លោក ជួប ស៊ីថា បានមានប្រសាសន៍ថា នីតិវិធីដោះស្រាយរឿងនេះ ត្រូវបានមន្ត្រីថ្នាក់លើបានឯកភាពគ្នារួចហើយ។ ដូច្នេះលោកជាមន្ត្រីថ្នាក់ក្រោម ត្រូវតែអនុវត្តតាម។ បើទោះបីជាកន្លងមក លោកបានគាំទ្រថា ដីធ្លីនោះ ជាកម្មសិទ្ធិរបស់ប្រជាពលរដ្ឋក៏ដោយ។
លោក ជួប ស៊ីថា ៖ «នីតិវិធីដោះស្រាយហ្នឹង ដោយផ្អែកលើខាងអធិការកិច្ចក្រសួង ក៏ដូចជា ស.ជ.ណ និងមានការចុះហត្ថលេខា និងចំណាររបស់សម្ដេចនាយករដ្ឋមន្ត្រី លើការអភិវឌ្ឍ»។
មេការគ្រប់គ្រងកម្មកររបស់ក្រុមហ៊ុន សូគីម៉ិច ឈ្មោះ យ៉ា បានបំភ្លឺថា ៖ «ដីរបស់ប្រជាជនប៉ះពាល់ហើយ។ បើនិយាយទៅ ដីនៅកន្លែងណាគាត់អត់ដឹងដែរ»។
ឯកសារថតចម្លងដែលវិទ្យុអាស៊ីសេរីទទួលបាន បង្ហាញថា រដ្ឋលេខាធិការនៃទីស្ដីការគណៈរដ្ឋមន្ត្រី លោក សេង លឹមនៅ បានជម្រាបប្រាប់មកអភិបាលក្រុងភ្នំពេញ លោក កែប ជុតិមា នៅថ្ងៃទី៦ ខែសីហា ឆ្នាំ២០១០ កន្លងទៅ នៅក្នុងលិខិត ស.ជ.ណ ថា ទុកជាមោឃៈនូវរាល់ឯកសារទាំងទ្បាយណាដែលចេញក្រោយឆ្នាំ១៩៩២ ពាក់ព័ន្ធនឹងការកាន់កាប់កម្មសិទ្ធិដីជាន់លើតំបន់អភិវឌ្ឍន៍ បឹងឈូក របស់ក្រុមហ៊ុន សូគីម៉ិច៕