គ្រូបង្រៀនមួយចំនួននៅក្នុងស្រុកបារាយណ៍ ខែត្រកំពង់ធំ បានឲ្យដឹងថា ពួកគាត់ជាអតីតគ្រូបង្រៀនសាលាបឋមសិក្សា ត្រូវបានក្រសួងអប់រំផ្លាស់ឲ្យទៅបង្រៀនថ្នាក់អនុវិទ្យាល័យអស់រយៈពេលពីរឆ្នាំមកហើយ ប៉ុន្តែគេនៅតែបើកប្រាក់ខែឲ្យកម្រិតបឋមសិក្សាដដែល។
គ្រូបង្រៀនអនុវិទ្យាល័យក្នុងស្រុកបារាយណ៍ លោក ផឿក ផល បានឲ្យដឹងនៅថ្ងៃទី២៦ មិថុនា ថា គ្រូបង្រៀនបឋមនៅស្រុកបារាយណ៍ចំនួន ១៦រួប ដែលក្រសួងបានឲ្យទៅរៀនបន្ថែមសម្រាប់ប្ដូរទៅបង្រៀនសិស្សនៅថ្នាក់អនុវិទ្យាល័យវិញ។ ហើយពួកគាត់បានបង្រៀននៅអនុវិទ្យាល័យតាំងពីឆ្នាំ២០០៩ ដល់បច្ចុប្បន្ន តែការិយាល័យអប់រំស្រុកមិនបានបើកប្រាក់ខែកម្រិតថ្នាក់អនុវិទ្យាល័យទេ ៖ "ម្ហូបក៏ថ្លៃ ទំនិញលើទីផ្សារកាន់តែឡើងថ្លៃ ប្រាក់ខែតិចតូចហើយបើកឲ្យមិនគ្រប់គ្រាន់ទៀត អ៊ីចឹងធ្វើឲ្យប៉ះពាល់ជីវភាពប្រចាំថ្ងៃ រកខ្ចីគេដើម្បីយកមកដោះស្រាយជីវភាពលំបាកមែនទែន"។
គ្រូបង្រៀនមួយរួបទៀតបានរៀបរាប់ថា ប្រាក់ខែបង្រៀននៅកម្រិតបឋមសិក្សាបានជាង ២០ម៉ឺនរៀល ក្នុងមួយខែ រីឯបង្រៀនកម្រិតអនុវិទ្យាល័យបានជាង ៣០ម៉ឺនរៀលក្នុងមួយខែ។ លោកបានអំពាវនាវឲ្យស្ថាប័នពាក់ព័ន្ធទាំងអស់ត្រូវដោះស្រាយជូនពួកគាត់អំពីករណីនេះ ៖ "វាពាក់ព័ន្ធ២០០៩ ដែលរៀនខ្ញុំរៀនបំប៉នចប់ហ្នឹង ក្រសួងគេចេញលិខិតប្រកាសមកថា គេមិនបើកប្រាក់ខែពេញមួយឆ្នាំហ្នឹងឲ្យទេ តែគេរៀនជំនាន់បំប៉នគ្រូវគ្គមុនៗគេបើកឲ្យ"។
ប្រធានការិយាល័យអប់រំស្រុកបារាយណ៍ លោក ហ៊ាន សុខ បានមានប្រសាសន៍ថា បញ្ហានេះក្រសួងអប់រំមិនទាន់ចេញលិខិតប្រកាសនៅឡើយ ថាគ្រូបង្រៀនទាំង ១៦នាក់នេះ ក្រសួងបញ្ចូលក្នុងក្របខ័ណ្ឌបង្រៀនកម្រិតថ្នាក់អនុវិទ្យាល័យ ឬហៅថាកម្រិតមូលដ្ឋាននោះ។ ហើយលោកក៏រង់ចាំប្រធានមន្ទីរអប់រំខែត្រឲ្យលោកបញ្ជូនបញ្ជីឈ្មោះគ្រូទាំងនោះទៅខាងមន្ទីរ ៖ "ការងារហ្នឹងវាជាការងាររបស់មន្ទីរ លុះត្រាមន្ទីរអប់រំផ្ដល់ផែនការគ្រប់ការិយាល័យមក ទើបយើងធ្វើទៅបាន យើមិនអាចធ្វើទៅកើតទេ"។
វិទ្យុអាស៊ីសេរីមិនអាចទាក់ទងប្រធានមន្ទីរអប់រំខែត្រ លោក កឹម វិសុទ្ធ បានទេនៅថ្ងៃអាទិត្យ ទី២៦ មិថុនា ដើម្បីសួរអំពីបញ្ហានេះ។ ប្រធានសមាគមគ្រូបង្រៀនកម្ពុជាឯករាជ្យប្រចាំខែត្រកំពង់ធំ លោក កែវ វិបុល បានមានប្រសាសន៍ថា ករណីគ្រូបឋមផ្លាស់ឲ្យទៅបង្រៀនថ្នាក់អនុវិទ្យាល័យវិញ ហើយមិនទាន់ទទួលបានប្រាក់ខែកម្រិតអនុវិទ្យាល័យនោះ មិនមែនមានតែនៅស្រុកបារាយណ៍នោះទេ គឺមាននៅក្នុងស្រុកផ្សេងៗទៀត ក្នុងខែត្រកំពង់ធំ។ លោក កែវ វិបុល បានបញ្ជាក់ថា លោកកំពុងតែស្រង់ស្ថិតិគ្រូទាំងនោះ ដើម្បីបញ្ជូនទៅមន្ទីរអប់រំខែត្រឲ្យដោះស្រាយបញ្ហានេះ។
របាយការណ៍របស់សមាគមគ្រូបង្រៀនកម្ពុជាឯករាជ្យប្រចាំខែត្រកំពង់ធំ បានសរសេរថា សាលារៀនទាំងអស់នៅក្នុងខែត្រកំពង់ធំ មានចំនួន ៥២៨សាលា ក្នុងនោះសាលាវិទ្យាល័យ និងអនុវិទ្យាល័យមានចំនួន៩១ និងសាលាបឋមសិក្សាមានចំនួន៤៣៧៕