មនុស្សម្នាក់ស្លាប់ក្នុងជម្លោះក្រុមក្មេងស្ទាវនៅខែត្របាត់ដំបង

ដោយ សុផល មុន្នី

2008-10-02

មនុស្សម្នាក់បានស្លាប់និងម្នាក់រងរបួសធ្លាយពោះដោយសារការប្រយុទ្ធគ្នារវាងក្រុមស្ទាវពីរក្រុមនៅទីអារាមមួយក្នុងកម្មវិធីចាក់ធុងបាសរាំលេងកម្សាន្តនាឱកាសបុណ្យភ្ជុំបិណ្ឌដែលទើបបញ្ចប់ទៅថ្មីៗនេះ។

ការវាយប្រហារគ្នានេះបានកើតឡើងកាលពីវេលាម៉ោង៩:៣០នាទី យប់ថ្ងៃទី២៨ ខែកញ្ញា នៅក្នុងបរិវេណវត្តសុត្ថារាម ហៅវត្តសេកសក ស្ថិតក្នុងភូមិសេកសក ឃុំផ្លូវមាស ស្រុករតនៈមណ្ឌល ខេត្តបាត់ដំបង។

លោក រស់ លឹមសឺន អធិការរងស្រុករតនៈមណ្ឌលបានថ្លែងថា មូលហេតុក្រុមក្មេងស្ទាវទាំងពីរក្រុមវាយប្រហារគ្នាកើតមានឡើងដោយសារការរាំប៉ះទង្គិចគ្នានៅក្នុងការចាក់ធុងបាសរាំលេងកម្សាន្ត។

លោកបន្តថា ការវាយប្រហារគ្នារវាងក្រុមក្មេងស្ទាវទាំងពីរក្រុមបណ្តាលឲ្យឈ្មោះ ណាត ណឺន អាយុ២០ឆ្នាំស្លាប់ និងឈ្មោះ សូ សោភ័ណ អាយុ២០ឆ្នាំ ជាទាហានកងពលតូចលេខ៥២ ត្រូវគេចាក់ធ្លាយពោះនឹងកាំបិត។

លោក រស់ លឹមសឺន បានមានប្រសាសន៍ថា ៖ «វ៉ៃប្រតាយប្រតប់គ្នា... ក្រុមគ្នាវាពីក្រោយចាក់ចំកន្លែងបោះដៃផុតខាងឆ្វេង។ ម្នាក់ទៀតឈ្មោះ សូ សោភ័ណ ភេទប្រុស ជាទាហាននៅកងពលតូចថ្មើរជើងលេខ ២ហ្នឹង ចាក់ធ្លាយពោះពីរកាំបិត ។ របួសម្នាក់ ស្លាប់ម្នាក់»។

តាមសាក្សីឃើញផ្ទាល់ភ្នែកបានឲ្យដឹងថា ក្រុមក្មេងស្ទាវទាំងពីរក្រុម មួយក្រុមៗមានគ្នីគ្នាជាង១០នាក់រស់នៅក្នុងស្រុករតនៈមណ្ឌលដូចគ្នា។

ជនល្មើសម្នាក់ក្នុងចំណោមក្មេងស្ទាវ៤នាក់ដែលត្រូវបានយោធាកងពលតូចលេខ៥២ចាប់បាន និងបញ្ជូនឲ្យកម្លំាងនគរបាលស្រុករតនៈមណ្ឌល បានថ្លែងថា ៖ «មូលហេតុហ្នឹងដំបូងឈ្មោះ ញ៉ាញ់ រាំធុងបាសជាមួយពួកខ្ញុំហ្នឹង រាំជាច្រើនបទមកហើយ ក៏បានម្ចាស់ធុងបាសហ្នឹងចាក់រាំវង់» ។

ជនល្មើសទាំង៤នាក់ដែលនគរបាលបញ្ជូនមកស្នងការដ្ឋាននគរបាលខេត្តបាត់ដំបងកាលពីថ្ងៃពុធម្សិលមិញ មានឈ្មោះ ជឿន សុភា អាយុ២៣ឆ្នាំ ឈ្មោះ ចាន់ ម៉ាន់ អាយុ២០ឆ្នាំ ឈ្មោះ យ៉ែម រិទ្ធី អាយុ២៣ឆ្នាំ និងឈ្មោះ រួម ខន អាយុ១៩ឆ្នាំ រស់នៅភូមិស្វាយស ឃុំត្រែង ស្រុករតនៈមណ្ឌល ខេត្តបាត់ដំបង។ ចំណែកគូកននិងភាគីម្ខាងទៀតសមត្ថកិច្ចកំពុងធ្វើការស្រាវជ្រាវដើម្បីតាមចាប់ខ្លួន។

មន្ត្រីស៊ើបអង្កេតរបស់អង្គការសិទ្ធិមនុស្សលីកាដូ លោក ហេង សាយហុង បានជំរុញឲ្យអាជ្ញាធរនិងតុលាការចាត់វិធានការដាក់ទោសទណ្ឌឲ្យបានខ្លាំងក្លាចំពោះក្រុមក្មេងស្ទាវទាំងនោះ។

លោក ហេង សាយហុង បានមានប្រសាសន៍ថា ៖ «បើកាលណាចាប់មករួចខ្លួន ចាប់មករួចខ្លួន អាហ្នឹងថ្ងៃក្រោយមកវាចេះតែរីកបន្តៗទៀត មិនចេះចប់ មិនចេះឈប់ទេ»។

លោកនាយករដ្ឋមន្ត្រី ហ៊ុន សែន កាលពីពេលកន្លងទៅថ្មីៗនេះបានជំរុញឲ្យអាជ្ញាធរគ្រប់ខេត្តក្រុងទាំងអស់ចាត់វិធានការឲ្យបានតឹងរ៉ឹងដើម្បីបង្រ្កាបក្រុមក្មេងស្ទាវនិងក្រុមបងតូចបងធំ ប៉ុន្តែនៅស្រុកមួយចំនួនក្នុងខេត្តបាត់ដំបងការវាយប្រហារកាប់ចាក់គ្នារវាងក្រុមក្មេងស្ទាវនិងក្រុមបងតូចបងធំបានកើតមានឡើងជាបន្តបន្ទាប់ ជាក់ស្តែងនៅស្រុកម៉ោងឫស្សី កាលពីថ្ងៃទី២៩ ខែកញ្ញា មានក្រុមក្មេងស្ទាវចំនួន៧នាក់បានផឹកស្រាស្រវឹង ជិះគោយន្តកន្ត្រៃ ប្រើដាវសាម៉ូរ៉ៃតាមកាប់បុរសម្នាក់ដែលកំពុងជិះកង់តាមផ្លូវ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព